უშიშროების საბჭოს სხდომაზე ნატოს სამიტზე ქვეყნის პროგრესის წარმოჩენის გზებზე შეთანხმდნენ

პრეზიდენტი ბრიუსელში ნატოს სამიტზე ნატოში წევრობის გზაზე საქართველოს პროგრესის ადეკვატურ დაფიქსირებას ითხოვს და აცხადებს, რომ პროგრესი ერთმნიშვნელოვანად არსებობს და ამას ნატოს ყველა წევრი ქვეყანა აღიარებს. ამის შესახებ მან უშიშროების საბჭოს სხდომაზე განაცხადა. ინფორმაციას პრეზიდენტის ადმინისტრაცია ავრცელებს.

"ვისაუბრეთ სწორედ ბრიუსელის სამიტის ერთიან პოზიციაზე იმიტომ, რომ აუცილებელია, ბრიუსელში ნატოს სამიტზე დაფიქსირდეს საქართველოს მიერ მიღწეული პროგრესი. ჩამოვყალიბდით:- როგორ უნდა დაფიქსირდეს საქართველოს პროგრესი ნატოსკენ მიმავალ გზაზე და როგორ უნდა გადავდგათ წინ ნაბიჯი ამ სამიტზე.
ნატოს სამიტამდე, 26 მაისი გვაძლევს ძალიან მნიშვნელოვან პლატფორმას იმისათვის, რომ ჩვენი პოზიცია ერთობლივად დავაფიქსიროთ - საქართველოში იქნებიან მაღალი დონის დელეგაციები და ეს, ამ მიმართულებით საინტერესო სამუშაო პლატფორმას გვაძლევს.
ფაქტი არის ის, რომ საქართველო ნატო-სთან მიმართებაში რეალურად მოწინავე ქვეყანაა და ამ თვალსაზრისით, საქართველოს პროგრესი უნდა გამოიხატოს შესაბამის ნაბიჯებში, რომელიც ჩვენ მიგვიყვანს წევრობამდე", - აღნიშნა გიორგი მარგველაშვილმა საქართველოს ეროვნული უშიშროების საბჭოს სხდომაზე, რომელზეც დღის წესრიგით გათვალისწინებული ოთხი საკითხი განიხილეს.

პრეზიდენტის განცხადებით, სხდომაზე განიხილებოდა რუსეთის ჰიბრიდული საფრთხეები და თავდაცვის სისტემაში რეფორმის მიმართულებით არსებული პროგრესი.
"განვიხილეთ ის რეფორმები, რომელსაც მე ჩემს საპარლამენტო გამოსვლაშიც და არაერთხელ დავუჭირე მხარი. თავდაცვის მინისტრმა გაგვიზიარა ინფორმაცია რეფორმებთან დაკავშირებით მიმდინარე პროცესებზე. შესაძლოა, ჩვენ განსხვავებული მოსაზრებები გვქონდეს სხვადასხვა საკითხებზე, მაგრამ, როდესაც საუბარია ქვეყნის თავდაცვისუნარიანობაზე, როდესაც საუბარია რუსეთის საფრთხის ნეიტრალიზაციაზე, როდესაც საუბარი არის ნატო-ში ინტეგრაციაზე, ამაზე უნდა ვიყოთ და ვართ კიდევაც კონსტრუქციულები", - განაცხადა გიორგი მარგველაშვილმა.

უშიშროების საბჭოს სხდომა პრეზიდენტის მოწვევით გაიმართა.