ერგნეთში შეხვედრა 10-საათიანი მოლაპარაკების შემდეგ უშედეგოდ დასრულდა

10 საათი გრძელდებოდა ერგნეთში ინციდენტების პრევენციისა და და მათზე რეაგირების მექანიზმის ფარგლებში 86-ე შეხვედრა. დღის წესრიგში 17 საკითხი იყო შეტანილი. ძირითადი განსახილველი თემა არჩილ ტატუნაშვილის და დავით ბაშარულის გარდაცვალება და ბორდერიზაცია იყო. 

დე ფაქტო ცხინვალს წარმომადგენლის, მურატ ჯიოევის განცხადებით ქართულ მხარეს შეხვედრაზე არ წარმოუდგენია ექსპერტიზის სხვა დასკვნა, შესაბამისად, დეტალებზე საუბარი ზედმეტი იყო.

„ნებისმიერი ადამიანის სიკვდილი ტრაგედიაა, თუმცა ხმაური ტატუნაშვილის გარდაცვალების გარშემო, ქართული მედიის მიერ არის გაბერილი. ის სპეცსამსახურების თანამშრომელი იყო და ჩვენთვის ცოცხალი უფრო წამოადგენდა ინტერესს. რაც შეეხება შინაგანი ორგანოების საკითხს, რაც ქართულმა მხარემ წამოჭრა, მე არ ვარ ექსპერტი... ჩვენმა სასამართლო-სამედიცინო ექსპერტიზის ბიურომ ქართულ მხარეს გადასცა ის მასალები, რისი პრაქტიკაც არსებობს ზოგადად და რაც საჭიროდ ჩათვალა“, - განაცხადა ჯიოევმა.

ქართული მხარე კი სამხარაულის ექსპერტიზის დასკვნას ელოდება, თუმცა ხაზს უსვამს, რომ შინაგანი ორგანოების გარეშე, ტატუნაშვილის გარდაცვალებაზე სრულფასოვანი სურათის შექმნა შეუძლებელია.

შსს-ს ანალიტიკური დეპარტამენტის უფროსის, კახაბერ ქემოკლიძის განცხადებით, ტატუნაშვილის გარდაცვალება არის მკვლელობა და ამაში ეჭვი ჯერ კიდევ იმან გააჩინა, რომ ჭიანურდებოდა ცხედრის გადმოცემის პროცესი, შემდეგ კი ცხედრის შინაგანი ორგანოების გარეშე გადმოცემამ.

სუსის ანალიტიკურის უფროსის მოადგილე, ირაკლი ანთაძის თქმით კი, ქართულმა მხარემ კატეგორიულად მოითხოვა შინაგანი ორგანოების გადმოცემა სრულფასოვანი ექსპერტიზის ჩასატარებლად. „დე ფაქტო ცხინვალი არ აღმოჩნდა ამ მოთხოვნაზე პასუხის გასაცემად“, - განაცხადა ანთაძემ.

10-საათიანი მოლაპარაკების შემდეგ მხარეები მომავალ, ივნისში დაგეგმილი შეხვედრის თარიღზე ვერ შეთამხდნენ. ამ თარიღის დაზუსტება ევროკავშირის ცხელი ხაზის მეშვეობით მოხდება. რაც შეეხება ივლისის შეხვედრას, ის 10 ივლისს გაიმართება.

არჩილ ტატუნაშვილის საქმეზე ბოლო შეხვედრა 1 მარტს შედგა, მისი მთავარი თემა არჩილ ტატუნაშვილის გადმოსვენების საკითხი იყო. მოლაპარაკებების უშედეგობის გამო მაშინ ქართულმა მხარემ შეხვედრა პროტესტის ნიშნად დატოვა.

არჩილ ტატუნაშვილი 22 თებერვალს, დილით ახალგორიდან გაიტაცეს, 23 თებერვალს, გამთენიისას კი, ოკუპირებული ცხინვალის ინფორმაციით, ის სუნთქვის უკმარისობით გარდაიცვალა. ტატუნაშვილის ცხედარი ქართული მხარის მიერ კონტროლირებად ტერიტორიაზე 20 მარტს გადმოასვენეს.