გიორგი გაბაშვილი: ხელისუფლება ცდილობს ვარდების რევოლუციის სახელი წაშალოს

თბილისის საკრებულოს დღევანდელ სხდომას პროტესტის ნიშნად არ ესწრებიან ფრაქცია „ევროპული საქართველოს“ წევრები. ამის შესახებ 1tv წერს.

როგორც ფრაქციის თავმჯდომარემ გოკა გაბაშვილმა აღნიშნა, ხელისუფლება ცდილობს, საქართველოს უახლესი ისტორიიდან წაშალოს ვარდების რევოლუციის სახელი.

„თბილისის საკრებულოს დამოუკიდებლობის დღის აღნიშვნა კონფრონტაციული საკითხით გადაწყვიტა. იმის მაგივრად, რომ ხელისუფლება ასეთ თარიღებზე საზოგადოების გამაერთიანებელი ინიციატივით გამოვიდეს, გამოაქვს საკითხი ვარდების რევოლუციისთვის სახელის გადარქმევაზე, რომელიც საზოგადოებისთვის მიუღებელია. ეს არის მცდელობა ისტორიიდან მნიშვნელოვანი ფურცლის ამოშანთვისა. ეს არის კონკურენცია, როცა ჩვენი უახლესი ისტორიის ძალიან მნიშვნელოვან თარიღებს ვაჯიბრებთ სხვა თარიღებს. ეს არის პოლიტიკური ვიწროპარტიული შურისძიება პოლიტიკურ ოპონენტზე, არის ისტორიის გადაწერისა და მნიშვნელოვანი თარიღების ამოღების უნიჭო მცდელობა. ე.წ. ფერადი რევოლუციები აღიზიანებს ერთადერთ ქვეყანას და სამწუხაროა, რომ საქართველოს ხელისუფლება და „ქართული ოცნება“ ბაძავს თავის დიდ მეგობარს რუსეთს, როცა ცდილობს საქართველოს უახლესი ისტორიიდან წაშალოს ვარდების რევოლუციის სახელი”, – განაცხადა გაბაშვილმა.

დღეს ვარდების მოედნისთვის სახელის შეცვლაზე საკრებულოში მსჯელობენ.

თბილისის საკრებულოს სახელდებისა და სიმბოლიკის კომისიამ ვარდების მოედნისთვის სახელის შეცვლასა და მისთვის პირველი რესპუბლიკის სახელის მინიჭების საკითხზე დადებითი რეკომენდაცია გასცა. 

ვარდების მოედნისთვის სახელის შესაძლო გადარქმევაზე ინფორმაცია 1 მაისს გავრცელდა. 2 მაისს თბილისის მერმა კახა კალაძემ განაცხადა, რომ ამ ინიციატივას მიესალმება. მოგვიანებით, ცნობილი გახდა, თბილისში ჯამში 18 ლოკაციისთვის იგეგმება სახლის შეცვლა.

მოედანი, რომელიც თბილისში, რუსთაველის გამზირის დასავლეთ ნაწილში მდებარეობს, 1983 წელს შეიქმნა და რესპუბლიკის მოედანი ეწოდა. მას 2003 წელს მომხდარი ვარდების რევოლუციის შემდეგ, 2005 წელს ვარდების რევოლუციის მოედანი ეწოდა.