მეტროს მემანქანეები: ხელზე ასაღები ხელფასი 1100 ლარამდე გვერიცხება და არა 1600

მოსამართლე გიორგი გოგიჩაშვილის განჩინების მიუხედავად, 3 ივნისიდან მეტროპოლიტენის მემანქანეების ნაწილი მაინც გაიფიცება. ისინი ხელფასების ზრდას მოითხოვენ, რასაც თბილისის მერიაში შეუძლებლად მიიჩნევენ. მერიაში აცხადებენ, რომ თუკი მეტროს პარალიზება მოხდება, ეს სისხლის სამართლის დანაშაული იქნება. 

თბილისში გადასაადგილებლად მეტროს მგზავრთა 1/3 იყენებს, ყოველდღიურად კი დაახლოებით 400 000 ადამიანი გადაადგილდება. მეტროს მემანქანეების ნაწილი აპირებს, რომ 3 ივნისიდან სამუშაო ადგილებზე აღარ გავიდეს და გაიფიცოს.

თბილისის მერიაში აცხადებენ, რომ მემანქანეების ხელფასები 1600-დან 1800 ლარამდე მერყეობს, მემანქანეები კი ამბობენ, რომ ხელზე ისინი 1100 ლარამდე იღებენ და არა 1600 ან 1800 ლარს. მათი თქმით 1600 ლარი დეპოს უფროსის მოადგილესაც კი არ აქვს.

თბილისის მეტროს მემანქანეებს და შპს „თბილისის სატრანსპორტო კომპანიას“ შორის კოლექტიური შრომითი დავა რამდენიმე თვეა მიმდინარეობს, რომლის ფარგლებში მიმდინარე მოლაპარაკებების წარუმატებლობის გამო, მეტროს თანამშრომლებმა კანონმდებლობით დადგენილი წესით 2018 წლის 3 მაისს გაფიცვა დააანონსეს, რომელიც თბილისის საქალაქო სასამართლოს მიერ 30 დღის ვადით 2018 წლის 3 ივნისამდე გადაიდო.

დავის პროცესში ადამიანის უფლებების სწავლებისა და მონიტორინგის ცენტრი მემანქანეთა მოთხოვნებს ლეგიტიმურად მიიჩნევენ.

2018 წლის 21 მაისს თბილისის საქალაქო სასამართლომ, ამჯერად განუსაზღვრელი ვადით შეზღუდა პროფესიულ გაერთიანების წევრი მეტროს მემანქანეების გაფიცვაში მონაწილეობის მიღების უფლება „სამუშაო საათების განმავლობაში“.

თბილისის მეტროპოლიტენის მემანქანეები საათობრივი ანაზღაურების გაზრდას 2 აპრილიდან ითხოვენ. თბილისის მერმა არაერთხელ განაცხადა, რომ მეტროპოლიტენის მემანქანეებს ხელფასს არ გაუზრდის.