ბუტა რობაქიძის დედა სარალიძის მხარდამჭერ აქციაზე არმისვლის მიზეზებს ასახელებს

პარლამენტის შენობასთან ზაზა სარალიძის მხარდამჭერ აქციას ბუტა რობაქიძის დედა სოციალურ ქსელში ეხმიანება. ის ხსნის იმ მიზეზებს, თუ რატომ არ დგას დღეს პარლამენტთან, მიუხედავად იმისა, რომ მთელი გულით უთანაგრძნობს შვილმოკლულ მამას.

„ნაცების ოცნება და გეგმაა ქუჩაში არეულობის მოწყობა და არეულობის გზით ხელისუფლებაში მოსვლა, რისთვისაც იყენებენ გაუბედურებულ მამას და ამ საშინელ ტრაგედიას. სწორედ ამიტომ არ მივედი აქციაზე და ვერ დავუდექი გამწარებულ მამას, ვის გვერდითაც ჩვენი შვილების მკვლელები და ქვენის დამაქცევრები დგანან...“ - წერს ია მეტრეველი.

ის შეცდომად მიიჩნევს მთავარი პროკურორის გადადგომასაც.

„რაც შეეხება შოთაძეს, ის არის კეთილშობილი ადამიანი და ძალიან გული დამწყდა, რომ თანამდებობა დატოვა. ეს ნაცების წისქვილზე ასხამს წყალს“, - განმარტავს მეტრეველი.

მანამდე მსგავსი შინაარსის განცხადება გააკეთა სანდრო გირგვლიანის მამამ, გურამ გირგვლიანმაც.

პარლამენტთან გასული წლის 1 დეკემბერს 51-ე სკოლასთან მომხდარი მკვლელობისას გარდაცვლილი დავით სარალიძის მამის, ზაზა სარალიძის მხარდამჭერი აქცია მიმდინარეობს.

დღეს  ხორავას ქუჩაზე მოზარდების მკვლელობის საქმეზე მოსამართლემ განაჩენი გამოაცხადა. პროკურატურა განაჩენს სააპელაციოში გაასაჩივრებს.  სასამართლო გადაწყვეტილებაზე განცხადებები გააკეთეს დაზარალებულების და ბრალდებულების ადვოკატებმაც.

დღის პირველ ნახევარში, საგანგებო პრესკონფერენცია გამართა მთავარმა პროკურორმაც და ამ საქმეზე პროკურატურის პოზიცია კიდევ ერთხელ განმარტა.  დღის მეორე ნახევარში კი მთავარმა პროკურორმა თანამდებობა დატოვა.

მკვლელობის საქმეზე პარლამენტმა სპეციალური საგამოძიებო კომისია შექმნა.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.