სარალიძის თქმით, ის გახარიას უწყებას არ ენდობა

ზაზა სარალიძემ პრემიერმინისტრის სპეციალური ბრიფინგის შემდეგ განაცხადა, რომ ის გიორგი გახარიას უწყებას არ ენდობა.

„პრემიერმა გააკეთა განცხადება, რომ გახარიას უწყება გამოიძიებს ამ საქმეს. ორი თვის წინ ბატონ გახარიას ტელევიზიით მივმართე, რომ მინდოდა მასთან შეხვედრა. მინდოდა, გამეზიარებინა ჩემი ეჭვები ამ საქმესთან დაკავშირებით. მან არა თუ არ მომისმინა, არც კი მიმიღო. ველოდები პრემიერის შემდეგ განცხადებას გადადგომის თაობაზე. მათ ისევ სურთ, რომ მოგვატყუონ. გადადგეს პრემიერი და დაიშალოს მათი სისტემა“, - განაცხადა ზაზა სარალიძემ.

როგორც საგანგებო ბრიფინგზე პრემიერმა განაცხადა, დღეიდან შინაგან საქმეთა სამინისტრო დაიბრუნებს საქმეს გამოძიებაში და მას პირადად გიორგი გახარია უხელმძღვანელებს.

მანამდე პრემიერი პარლამენტთან მივიდა, სადაც ხორავას ქუჩაზე მოკლული ერთ-ერთი არასრულწლოვნის მამის ზაზა სარალიძის მხარდამჭერი აქცია მიმდინარეობს. 

თუმცა აქციის მონაწილეებმა გიორგი კვირიკაშვილს სიტყვით გამოსვლის დასრულების საშუალება არ მისცეს, რის შემდეგაც მან პარლამენტის მიმდებარე ტერიტორია დატოვა.

31 მაისს ხორავას ქუჩაზე მოზარდების მკვლელობის საქმეზე მოსამართლემ განაჩენი გამოაცხადა. პროკურატურა განაჩენს სააპელაციოში გაასაჩივრებს.  სასამართლო გადაწყვეტილებაზე განცხადებები გააკეთეს დაზარალებულების და ბრალდებულების ადვოკატებმაც.

დღის პირველ ნახევარში, საგანგებო პრესკონფერენცია გამართა მთავარმა პროკურორმაც და ამ საქმეზე პროკურატურის პოზიცია კიდევ ერთხელ განმარტა.  დღის მეორე ნახევარში კი მთავარმა პროკურორმა თანამდებობა დატოვა.

მკვლელობის საქმეზე პარლამენტმა სპეციალური საგამოძიებო კომისია შექმნა.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.