ლომჯარია: კარვების დაშლა იყო არაპროპორციული ჩარევა გამოხატვის თავისუფლებაში

პოლიციის მიერ პარლამენტის წინ გაშლილი კარვების კონსტრუქციის დაშლას და ტერიტორიიდან გატანას სახალხო დამცველი ნინო ლომჯარია სოციალურ ქსელში ეხმიანება.

"ისე სწრაფად ვითარდება მოვლენები, რთულია ყველაფრის შეფასება, მაგრამ, ამდროისთვის, მიგვაჩნია, რომ კარვების დაშლა ტროტუარზე იყო არაპროპორციული ჩარევა გამოხატვის თავისუფლებაში; შსს-მ უნდა გამოაქვეყნოს ყველა დაკავებული პირის შესახებ ინფორმაცია, ვინ და რა მუხლითაა დაკავებული, სათითაოდ ვარკვევთ და სრული სურათი არ გვაქვს; ყველას შეუძლია მოგვმართოს, მათი დაკავების კანონიერების შესასწავლად; ჩვენი წარმომადგენლებიც იმყოფებიან ადგილზე და აკვირდებიან ვითარებას; სასამართლოს სამზარეულოში მომხდარ ინციდენტზე უნდა დაიწყოს საქმის შესწავლა, მოწმეთა ჩვენებებზე და არსებულ ვიდეომასალებზე დაყრდნობით, უფლებამოსილების გადამეტების შემთხვევაში დადგეს შესაბამისი პირების პასუხისმგებლობა,"- წერია განცხადებაში.

როგორც დღისით ზაზა სარალიძემ თქვა, აქცია 18:00 საათზე განახლდება თუმცა შეიცვლება თუ არა ეს დრო ბოლო საათის განმავლობაში განვითარებული მოვლენებიდან გამომდინარე, ჯერ უცნობია.

ნაციონალური მოძრაობის წევრის ზაალ უდუმაშვილის თქმით, სამართალმდაცველებმა პარლამენტის წინ აქციაზე 10-მდე ადამიანი დააკავეს, მათ შორის ერთი არასრულწლოვანია.

როგორც უდუმაშვილმა "იმედს" განუცხადა, დაკავებულები არიან ნიკა მელია, ირაკლი ნადირაძე, ლევან ხაბეიშვილი და სხვები.

შეგახსენებთ, რომ დღეს დილით ზვიად კუპრავა, ლაშა ცუცქირიძე და კიდევ 2 პირი დააკავეს. როგორც შსს-მ განაცხადა, ისინი წვრილმანი ხულიგნობისა და პოლიციელის კანონიერი მოთხოვნისადმი დაუმორჩილებლობის ფაქტზე დააკავეს.