პარლამენტთან ზვიად კუპრავა და კიდევ 3 პირი დააკავეს

პარლამენეტის წინ აქციის მონაწილეების თქმით, ზვიას კუპრავა, ლაშა ცუცქირიძე და კიდევ 2 პირი დააკავეს. ზაზა სარალიძემ სამართალდამცველებს ნახევარი საათი მისცა ვადა, რათა ისინი კარვებთან დააბრუნონ.

გარდა ამისა, ხორავას ქუჩაზე მოკლული ერთ-ერთი არასრულწლოვნის მამამ მოსახლეობას მოუწოდა, რომ 2 საათზე პარლამენტთან მივიდნენ.

როგორც Imedinews-ს შსს-ში განუცხადეს, თანამშრომლების მიერ თბილისში, რუსთაველის გამზირზე პარლამენტის შენობის წინ მიმდინარე აქციაზე წვრილმანი ხულოგნობისა და პოლიციელის კანონიერი განკარგულების დაუმორჩილებლობის ფაქტზე ადმინისტრაციული სამართალდარღვევისთვის 4 პირია დაკავებული.

წუხელ პარლამენტთან აქციის მონაწილეებმა კარვები გზის სავალ ნაწილზე გადაიტანეს. ზაზა სარალიძის თქმით, მათი მოთხოვნების დაკმაყოფილებამდე აქციები პერმანენტულ ხასიათს მიიღებს.

მოგვიანებით, რუსთაველის გამზირზე საავტომობილო მოძრაობა ნაწილობრივ აღდგა.

პარლამენტის წინ გამართული აქციის მიზანი, როგორც თავად „ერთიანი ნაციონალური მოძრაობის“, „ეროვნულ-დემოკრატიული პარტიის“, „სახელმწიფო ხალხისათვის“, „ახალი საქართველოსა“ და „ლეიბორისტული პარტიის“ ლიდერები ამბობენ, ზაზა სარალიძისა და მალხაზ მაჩალიკაშვილისთვის სოლიდარობის გამოცხადებაა. 

ევროპული საქართველო დღეს დაგეგმილ აქციაში მონაწილეობას არ მიიღებს.

მანამდე ხორავას ქუჩაზე სისხლიანი გარჩევისას გარდაცვლილი დავით სარალიძის მამამ ხელისუფლებას საქმის გამოძიებისთვის ვადა 10 ივნისამდე მისცა. წინააღმდეგ შემთხვევაში, მან განაცახადა, რომ პარლამენტთან მასობრივ აქციებს განაახლებდა.

გუშინ შსს-მ ხორავას ქუჩაზე მომხდარი მკვლელობის საქმის ერთ-ერთი ფიგურანტის მამა, მირზა სუბელიანი მკვლელობის შეუტყობინებლობისთვის სისხლის სამართლის კოდექსის 376-ე მუხლით დააკავა. შსს-ს ინფორმაციით, სუბელიანი ბრალს აღიარებს.