რომან გოცირიძე: აზერ სულეიმანოვი მხოლოდ ვითარებას არკვევდა

ნაციონალური მოძრაობის წევრი, დეპუტატი რომან გოცირიძე აცხადებს, რომ აზერ სულეიამანოვი მარნეულში მომხდართან დაკავშირებით, მხოლოდ ერთ პროცედურაში მონაწილეობდა - ის საქმეს არკვევდა. ასე შეაფასა გოცირიძემ პროკურატურის მიერ სულეიმანოვის წინააღმდეგ დაწყებული გამოძიება. ინფორმაციას 1tv ავრცელებს.

"შემთხვევა იყო შემდეგი, ეს ახალგაზრდა, რომელსაც მართლაც მოექცნენ საშინლად, თურმე ყოფილა „ქართული ოცნების“ წევრი და თქვენი აქტივისტი, რომელიც გამოვიდა მიტინგზე, შემდეგ მოხდა ამ ახალგაზრდის დაბარება შეიხის, აზერ სულეიმანოვისა და საკრებულოს მაჟორიტარი დეპუტატების მიერ. აზერ სულეიმანოვი მათ სასულიერო ლიდერთან ერთად მონაწილეობდა ამ ახალგაზრდობასთან საუბარში. სულეიმანოვი იცნობს ამ ბიჭს, ექვსი წლის განმავლობაში „ქართული ოცნების“ მხარდამჭერი, „ნაციონალური მოძრაობის“ წინააღმდეგ მებრძოლი იყო. კითხვა იყო ერთადერთი, რატომ მონაწილეობს „ნაციონალური მოძრაობის“ სახელით და რატომ აკეთებ განცხადებებს. ამისთვის შეიხი დაბარებულია პროკურატურაში, ახლა იმყოფება რუსთავის პროკურატურაში. აზერ სულეიმანოვი არის გაკვირვებული, ამისთვის აღიძრა სისხლის სამართლის საქმე. მთელი საქართველოს გასაგონად აცხადებთ, რომ იგი არის ბრალდებული, უნდა გამოიძიოთ ყველაფერი, რა მოხდა, რატომ იყო ეს ყველაფერი პროვოკაცია და რა შუაში იყო აზერ სულეიმანოვი, რომელიც მხოლოდ და მხოლოდ ერთ პროცედურაში მონაწილეობდა, რომელსაც ჰქვია ვითარების გარკვევა და იყო თუ არა ეს პროვოკაცია თუნდაც „ნაციონალური მოძრაობის“ წინააღმდეგ. ეს მითხრა ახლა აზერმა ტელეფონით. ამას ჩვენ გავარკვევთ და არავის არ მოგცემთ იმის უფლებას, რომ პოლიტიკური ნიშნით დევნოთ და გამოიგონოთ ახალ-ახალი იურიდიული ტერმინები, როგორიც არის განრიდება, თუ არიდება და ა.შ”, – განაცხადა რომან გოცირიძემ.

დღეს დილით, პროკურატურამ მარნეულის მერი თემურ აბაზოვი მოქალაქის მიმართ დამამცირებელი და არაადამიანური მოპყრობის ფაქტზე ბრალდებულად ცნო და დააკავა. მოგვიანებით პროკურატურამ ბრიფინგი გამართა, სადაც განაცხადა, რომ საქმისწარმოება დაიწყო კიდევ სამი ადამიანის მიმართ. პროკურატურამ მოქალაქის ცემის ფაქტზე, სისხლის სამართლებრივი დევნა დაიწყო საქართველოს პარლამენტის წევრის, პარტია „ერთიანი ნაციონალური მოძრაობიდან“ - აზერ სულეიმანოვის, მარნეულის მუნიციპალიტეტის საკრებულოს წევრის, პარტია „ქართული ოცნებიდან“ - რამინ ალახვერდიევის და მარნეულის მერის ნათესავის, მოქალაქე ე.გ-ს მიმართ. 

საქმეზე ჩატარებული გამოძიებით დადგინდა, რომ 2018 წლის 10 ივნისს, ელჩინ ალახვერდიევი იყო ქ. თბილისში, რუსთაველის გამზირზე გამართულ საპროტესტო აქციაზე, სადაც მარნეულის მუნიციპალიტეტის მერზე, თემურ აბაზოვზე განაწყენებულმა, სოციალურ ქსელ „ფეისბუქის“ მეშვეობით Live-ჩაერთო, რა დროსაც, თემურ აბაზოვის მეუღლეს მიაყენა სიტყვიერი შეურაცხყოფა.

იმავე დღეს, ღამის საათებში, მას დაუკავშირდა პარტია „ერთიანი ნაციონალური მოძრაობის“ წევრი რაგიმ ასკეროვი, რომელმაც სთხოვა შეხვედრა. ასკეროვის მოთხოვნით ისინი შეხვდნენ ერთმანეთს პარტია „ერთიანი ნაციონალური მოძრაობის“ მარნეულის ოფისში, რომელიც მდებარეობს ქ. მარნეულში, რუსთაველის ქუჩაზე. ოფისში ასევე იმყოფებოდნენ საქართველოს პარლამენტის წევრი „ერთიანი ნაციონალური მოძრაობიდან“ აზერ სულეიმანოვი, მარნეულის მუნიციპალიტეტის საკრებულოს წევრი, პარტია „ქართული ოცნებიდან“ რამინ ალახვერდიევი, მარნეულის მუნიციპალიტეტის მერის ნათესავი ე.გ და სხვა პირები.

პარლამენტის წევრმა აზერ სულეიმანოვმა ელჩინ ალახვერდიევს მოსთხოვა აეხსნა, ვისი დავალებით ჩერთო სოციალური ქსელის პირდაპირ ეთერში, რის შემდეგაც აზერ სულეიმანოვმა, რამინ ალახვერდიევმა და მოქალაქე ე.გ-მ ელჩინ ალახვერდიევს მიაყენეს ფიზიკური შეურაცხყოფა. აღნიშნულის შემდეგ, ელჩინ ალახვერდიევი მარნეულის საკრებულოს წევრებმა ჯეიხუნ ჩოიდაროვმა და რამინ ალახვერდიევმა წაიყვანეს ქ.მარნეულში, ე.წ. "ჟეჟებეს" რესტორნის მიმდებარე ტერიტორიაზე, სადაც მათ ელოდებოდა მარნეულის მუნიციპალიტეტის მერი თემურ აბაზოვი.

მისვლისთანავე თემურ აბაზოვმა ელჩინ ალახვერდიევს შეაფურთხა სახეში და მიაყენა ფიზიკური შეურაცხყოფა, შემდეგ აიძულა ჩართულიყო ფეისბუქის პირდაპირ ეთერში, მოეხადა ბოდიში და სიტყვიერი შეურაცხყოფა მიეყენებინა საკუთარი ცოლისთვის, ბოლოს კი მარნეულის მუნიციპალიტეტის მერმა თემურ აბაზოვმა ძალადობით, ღირსების შელახვის მუქარით, ელჩინ ალახვერდიევი აიძულა მოეშარდა ჭიქაში და შარდით მოებანა სახე.