წულუკიანი: ვიყავი და ვარ ქართული ოცნების გუნდური მოთამაშე

იუსტიციის მინისტრის მოვალეობის შემსრულებელი თეა წულუკიანი შეკითხვაზე "დარჩება თუ არა ის განახლებულ მინისტრთა კაბინეტში", ამბობს, რომ ამაზე ინფორმაცია არ აქვს.

წულუკიანის თქმით, პარლამენტის თავმჯდომარემ ირაკლი კობახიძემ სწორი პასუხის გასცა პრეზიდენტ გიორგი მარგველაშვილს, რომელმაც პრემიერმინისტრების შეცვლასთან დაკავშირებით მიმდინარე პოლიტიკური სიტუაცია და ბიძინა ივანიშვილი გააკრიტიკა. 

"ჩვენ ყველანი უნდა მივეჩვიოთ იმას, რომ სამთავრობო შემადგენლობის შესახებ გადაწყვეტილებებს ამ მოდელში იღებს მმართველი პარტია. შესაბამისად, მე არ შეიძლება ვიცოდე ვინ იქნება პრემიერმინისტრობის კანდიდატი, როგორ დააკომპლექტებს ის (მომავალი პრემიერი) საკუთარ კაბინეტს. ძალიან კარგი იქნება თუ ჩვენ ყველანი მშვიდად შევხვდებით, მათ შორის საქართველოს პრეზიდენტიც, რომ ეს არის პროცედურა, რომ ქვეყანას მართვას ქართული ოცნების პარტია და რომ პრემიერის და მინისტრების ცვლილებით არ იცვლება არც შიდა და არც საგარეო კურსი.

დაველოდით მოვლენების განვითარებას. მე ყოველთვის ვიყავი და ვარ ქართული ოცნების გუნდური მოთამაშე", - განაცხადა თეა წულუკიანმა.

პრეზიდენტმა გიორგი მარგველაშვილმა მიმდინარე პოლიტიკური სიტუაცია გააკრიტიკა და განაცხადა, რომ უნდა დასრულდეს ის პროცესი, როდესაც მოსახლეობამ, საზოგადოებამ არ იცის, რის გამო "ტოვებენ თანამდებობას წარმატებული პრემიერმინისტრები, ვინ და რატომ ხსნის პრემიერმინისტრებს".

პარლამენტის თავმჯდომარემ მის საპასუხოდ კი განაცხადა, რომ პრეზიდენტი ასეთ კომენტარებს არ უნდა აკეთდებს. მისი თქმით, საქართველოს 90-იანი წლებიდან მოყოლებული საპრეზიდენტო მმართველობის პირობებში უწევს ცხოვრება და ამის გამო ის პროცესები, რაც დღეს (საპარლამენტო მმარველობისას) ქვეყანაში მიმდინარეობს, უცხო მოვლენაა.

17:00 საათზე პოლიტიკური გაერთიანება „ქართული ოცნება-დემოკრატიული საქართველოს“ ცენტრალურ ოფისში უმრავლესობის გაფართოებული სხდომა გაიმართება. სხდოამზე პრემიერმინისტრობის კანდიდატურაზე იმსჯელებენ.

გიორგი კვირიკაშვილმა გადადგომის შესახებ გუშინ სპეციალურ ბრიფინგზე განაცხადა. მისი თქმით, პარტიის თავმჯდომარეს უნდა მიეცეს შესაძლებლობა, რომ მან გუნდი დააკომპლექტოს.