საპარლამენტო ოპოზიცია დროებით მთავრობას მხარს არ დაუჭერს

პარლამენტში გაერთიანებულ საკომიტეტო სხდომებზე მინისტრობის კანდიდატებს უსმენენ. "ნაციონალური მოძრაობის" წევრის, სალომე სამადაშვილის თქმით, დროებით მთავრობის დამტკიცების იდეამ "ქვეყანას კომიკურ ვითარებაში" ჩააგდო. დეპუტატი ამბობს, რომ მისი გუნდი არც 3-კვირიან მთავრობას დაუჭერს მხარს და არც მამუკა ბახტაძის საბოლოო გუნდს.

"არ მახსენდება ჩვენი ქვეყნის პოლიტიკურ ისტორიაში მსგავსი ფაქტი, როდესაც 3 კვირით ამტკიცებს მთავრობას პარლამენტი. ეს იმის მანიშნებელია, რომ ხელისუფლება ძალიან ღრმა პოლიტიკურ კრიზისშია შესული. შესაბამისად, სრულიად დაუფიქრებელი იყო ყველა ის მოქმედება, რაც ივანიშვილის მხრიდან განხორციელდა და ძალიან სამწუხაროა, რომ უახლოეს კვირებში გვეყოლება არაქმედითუნარიანი მთავრობა და ამან შესაძლოა კიდევ უფრო გაამწვავოს ვითარება. როგორც ჩანს, ძალიან ღრმა არის დაპირისპირება მმართველ გუნდშიც და ფაქტიურად მათ არ ძალუძთ უმრავლესობას შესთავაზონ ქმედითი მთავრობა, რომელიც გრძელვადიან გეგმას წარუდგენს უმრავლესობას", - განაცხადა სალომე სამადაშვილმა.

"ევროპული საქართველოს" წევრი, დეპუტატი ზურაბ ჭიაბერაშვილი ამბობს, რომ მისი პარტია წარმოდგენილ მთავრობას მხარს ვერ დაუჭერს. 

"ბახტაძე ისევეა პასუხისმგებელი იმ წარუმატებელ ეკონომიკურ პოლიტიკაზე, რომელმაც ქვეყანაში გაჭირვება და სიღარიბე მოიტანა, როგორც ბიძინა ივანიშვილის ნებისმიერი ხელქვეითი. იმის გამო, რომ ამ მთავრობის არსი არ იცვლება და ეს არის ბიძინა ივანიშვილის ხელქვეითების მთავრობა, შეუძლებელია, რომ ნებისმიერმა ასეთმა ცვლილებამ რაიმე სარგებელი მოუტანოს ქვეყანას" - თქვა ჭიაბერაშვილმა.

18 ივნისს პარლამენტის თავმჯდომარემ ირაკლი კობახიძემ განაცხადა, რომ ოპოზიციას პირად საუბრებში ცვლილებების ორ ეტაპად ჩატარებაზე უკმაყოფილება არ გამოუხატავს.

საკომიტეტო მოსმენებზე მინისტრობის რამდენიმე კანდიდატმა თავისი ხედვები უკვე წარადგინა.

20 ივნისს ქუთაისში პარლამენტის რიგგარეშე სხდომა გაიმართება, სადაც პარლამენტი მთავრობისთვის ნდობის გამოცხადების საკითხზე იმსჯელებს.

უკვე ცნობილია, რომ მამუკა ბახტაძის კაბინეტიდან თავდაპირველად მხოლოდ ის მინისტრები მიდიან, ვინც თანამდებობა საკუთარი ნებით დატოვა,  ესენია: მიხეილ ჯანელიძე და დიმიტრი ქუმსიშვილი. ცვლილებების პირველ ეტაპზე მინისტრების მოვალეობას მოადგილეები შეასრულებენ.   ცვლილებების მეორე ეტაპი უფრო მასშტაბური იქნება და გუნდში ახალი სახეები გამოჩნდებიან. 

მამუკა ბახტაძე 14 ივნისს ქართულმა ოცნებამ პრემიერმინისტრობის კანდიდატად დაასახელა. გიორგი კვირიკაშვილმა პრემიერმინისტრის თანამდებობა 12 ივნისს დატოვა. ამის მიზეზად მან პარტიის თავმჯდომარესთან აზრთა სხვადასხვაობა დაასახელა.