თეა წულუკიანმა კვირიკაშვილის შეცდომა დაასახელა

„არავითარი ძიება თავიდან არ დაწყებულა. მე ამას პირველად ვამბობ პირდაპირ ეთერში: როდესაც პრემიერმინისტრმა კვირიკაშვილმა ეს განცხადება გააკეთა აქციიდან დაბრუნებულმა, დაუშვა, სამწუხაროდ, შეცდომა. მე ამას ღიად ვამბობ.“, - ამის შესახებ იუსტიციის მინისტრმა თეა წულუკიანმა გადაცემაში „პირისპირ“ განაცხადა.

საქმე ყოფილი პრემიერმინისტრის გადაწყვეტილებას შეეხება, როდესაც მან ხორავას ქუჩაზე მომხდარი მკვლელობის გამოძიება პროკურატურას ჩამოართვა და შსს-ს გადასცა.

„სამწუხაროა, რომ ამაზე მიწევს საუბარი. არავითარი გამოძიება არ დაწყებულა თავიდან. თქვენ თავად შეგიძლიათ ყოფილ პრემიერს ჰკითხოთ და ის თავად დაგიდასტურებთ, რომ ეს იყო ფაქტობრივი შეცდომა... როდესაც საქმეზე დადგა მტკიცებულებები იმ ვადაში, რა ვადასაც (40-დღიანს) ითვალისწინებს არასრულწლოვანთა მართლმსაჯულების კოდექსი, რა დონეზეც იყო მზად მტკიცებულებები რამდენიმე პირის ნაწილში, ის წარიმართა სასამართლოში, ხოლო დანარჩენ ნაწილებზე საქმის, როგორც დღეს ბატონ გახარიამაც დაადასტურა, გამოიყო გამოძიებიდან დანარჩენი ეპიზოდები და მათზე გამოძიება გაგრძელდა. გამოძიება პირველი დღიდან დღემდე მიმდინარეობდა შსს-ში და არა პროკურატურაში და პროკურატურას პირველი დღიდან დღემდე ჰქონდა შსს-ს გამომძიებლებზე საპროცესო ხელმძღვანელობის ფუნქცია. ეს არის რეალობა“, - განმარტა წულუკიანმა

ის გადაცემაში ირაკლი შოთაძეს ისევ შეეხო .მისი თქმით, ერთადერთი პროკურორი, რომელიც მისი მონაწილეობით შეირჩა, ირაკლი შოთაძე იყო და ის, შესაბამისად, ინაწილებს პასუხისმგებლობას, თუმცა ამ დრომდე მიიჩნევს, რომ შოთაძე მთავარი პროკურორობიდან არ უნდა გადამდგარიყო. ამის შესახებ მან გადაცემაში „პირისპირ“ განაცხადა.

წულუკიანი კვლავაც აცხადებს, რომ შოთაძე იყო კარგი პროკურორი, რომელმაც 2 წლის განმავლობაში 8 გამომძიებლით 45 მილიონის ქონების დაბრუნება შეეძლო მოქალაქეებისთვის, რომელიც თავის დროზე „ოთარ კახიძემ წაართვა მოქალაქეებს თავის ხელისუფლებასთან ერთად“.

დღეს პარლამენტში მინისტრთა კაბინეტის წარდგენისას, პრემიერმინისტრობის კანდიდატ მამუკა ბახტაძეს ევროპული საქართველოს წევრმა ოთო კახიძემ 10 მიზეზი დაუსახელა, რატომ არ უნდა იყოს მის კაბინეტში თეა წულუკიანი. 

ყოფილმა პრემიერმინისტრმა გიორგი კვირიკაშვილმა 1 ივნისს, სპეციალურ ბრიფინგზე განაცხადა, რომ ხორავას ქუჩაზე არასრულწლოვნების მკვლელობის საქმის გამოძიებას შსს გადაიბარებდა.

მანამდე პრემიერი პარლამენტთან მივიდა, სადაც ხორავას ქუჩაზე მოკლული ერთ-ერთი არასრულწლოვნის მამის ზაზა სარალიძის მხარდამჭერი აქცია მიმდინარეობდა. თუმცა აქციის მონაწილეებმა გიორგი კვირიკაშვილს სიტყვით გამოსვლის დასრულების საშუალება არ მისცეს, რის შემდეგაც მან პარლამენტის მიმდებარე ტერიტორია დატოვა.

31 მაისს ხორავას ქუჩაზე მოზარდების მკვლელობის საქმეზე მოსამართლემ განაჩენი გამოაცხადა, რომლის მიხედვითაც პროკურატურის მიერ წარდგენილი ორი ბრალდებულისგან არცერთს არ დაუდასტურდა არასრულწლოვანი დავით სარალიძის განზრახ მკვლელობა. ამ განაჩენს საპროტესტო აქციები მოჰყვა.

საგანგებო პრესკონფერენცია გამართა მთავარმა პროკურორმა ირაკლი შოთაძემაც და მან თანამდებობა დატოვა.

მკვლელობის საქმეზე პარლამენტმა სპეციალური საგამოძიებო კომისია შექმნა.

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.