თალაკვაძე: ოთხოზორია-ტატუნაშვილის შავი სია მზად არის

საპარლამენტო უმრავლესობის ლიდერი არჩილ თალაკვაძე აცხადებს, რომ ოთხოზორია-ტატუნაშვილის სია, პრაქტიკულად, მზად არის და მთავრობა ამ სიას პარლამენტს დამტკიცებისთანავე წარუდგენს. დეპუტატი ოპოზიციის ბრალდებებს გამოეხმაურა, რომლის თანახმად, მთავრობამ პარლამენტის მიერ დათქმული ვადა დაარღვია.

"ოთხოზორია-ტატუნაშვილის შავ სიასთან დაკავშირებით ჩვენ გვქონდა კონსულტაციები და ამაზე საუბარი გვქონდა ოპოზიციასთან. ეს სია, პრაქტიკულად, მზად არის და მთავრობამ გამოთქვა მზადყოფნა, რომ დამტკიცებისთანავე წარმოადგინოს სია პარლამენტში, რაც მნიშვნელოვანია როგორც ოთხოზორიას მკვლელობის საქმეზე, ასევე ტატუნაშვილის სიცოცხლის ხელყოფასთან დაკავშირებით. არიან კონკრეტული ბრალდებულები და ყველაფერს გავაკეთებთ, რომ ეს ადამიანები, ერთი მხრივ, მიეცნენ პასუხისგებაში და მათ მიმართ მართლმსაჯულება განხორციელდეს, მეორე მხრივ - მათ შევუქმნით ყველანაირ შეზღუდვებს საერთაშორისო მასშტაბით, რომ საკუთარ თავზე იგრძნონ, რას ნიშნავს ადამიანის სიცოცხლის ხელყოფა და ადამიანის უფლებების დარღვევა", - განაცხადა არჩილ თალაკვაძემ.

„ევროპული საქართველოს“ წევრმა ირაკლი აბესაძემ ხელისუფლებას პრეტენზიები წაუყენა, რომ „ოთხოზორია-ტატუნაშვილის სია“ ამ დრომდე წარდგენილი არ არის და დაირღვა პარლამენტისთვის მიცემული ვადა,

პარლამენტმა აღმასრულებელ ხელისუფლებას „ოთხოზორია-ტატუნაშვილის“ სიის წარდგენა 15 ივნისამდე დაავალა, რაც რეზოლუციითაც განისაზღვრა.

5 მარტს ევროპულმა საქართველომ უმრავლესობას ტატუნაშვილთან დაკავშირებით რეზოლუციის საერთო დოკუმენტის შექმნა შესთავაზა. 21 მარტს, საქართველოს პარლამენტმა არჩილ ტატუნაშვილთან დაკავშირებით რეზოლუციის პროექტი 106 ხმით დაამტკიცა.

რეზოლუციის ერთ-ერთ მთავარ კომპონენტად მიიჩნევა სანქციების ნაწილი, ანუ „ოთხოზორია-ტატუნაშვილის სიის“ შექმნა. რეზოლუციის თანახმად, სიაში უნდა შევიდნენ ოკუპირებულ ტერიტორიებზე საქართველოს მოქალაქეთა მკვლელობაში, გატაცებაში, წამებასა და არაჰუმანურ მოპყრობაში, ჯანმრთელობის მძიმე დაზიანებასა და დანაშაულის დაფარვაში ბრალდებული და მსჯავრდებული პირები.

22 მარტს, „ოთხოზორია-ტატუნაშვილის სიის“ მიღების პერსპექტივას რუსეთის დუმიდან გამოეხმაურნენ და აღნიშნეს რომ დოკუმენტი რუსეთ-საქართველოს პარლამენტთშორისი ჯგუფის მუშაობას გაართულებს.    

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, ოკუპირებული ცხინვალის ინფორმაციით, ის თითქოს სუნთქვის უკმარისობით გარდაიცვალა. ნაწამები ტატუნაშვილის ცხედარი ქართულ მხარეს 26-დღიანი ლოდინის შემდეგ გადმოსცეს.

გიგა ოთხოზორია ოკუპირებული გალის რაიონის სოფელ ნაბაკევის მოსაზღვრე ზუგდიდის სოფელ ხურჩაში 2016 წლის 19 მაისს მოკლეს.სასამართლომ მისი მკვლელი დაუსწრებლად დამნაშავედ ცნო და 14 წლით თავისუფლების აღკვეთა მიუსაჯა.