ტატუნაშვილის ოჯახმა რუსეთს სტრასბურგში შეიძლება აგვისტომდე უჩივლოს

ცხინვალში დაღუპული არჩილ ტატუნაშვილის ოჯახმა რუსეთის წინააღმდეგ სარჩელი სტრასბურგის სასამართლოში შეიძლება ივლისში შეიტანოს. ეს იმაზეა დამოკიდებული, იქნება თუ არა ექსპერტიზის დასკვნა მზად, რომელიც სარჩელს უნდა დაერთოს. ამის შესახებ არჩილ ტატუნაშვილის მამამ გიორგი ტატუნაშვილმა ახალციხეში, მისი შვილის ხსოვნისადმი მიძღვნილ საღამოზე თქვა. ინფორმაციას 1tv ავრცელებს.

"ინდივიდუალური სარჩელი რუსეთის ფედერაციის წინააღმდეგ სტრასბურგის სასამართლოში შესაძლოა, ივლისში გადაიგზავნოს. სტრასბურგში სარჩელი ინდივიდუალურად შევა აგვისტოს ბოლომდე. როგორც იუსტიციის სამინისტრომ თქვა, სახელმწიფოთაშორისი უკვე გაიგზავნა. ამას თუ დასკვნა არ ექნება, რომ წამების შედეგად გარდაიცვალა, მაშინ აზრი არ აქვს სარჩელს. მე ჩემი თვალით ვნახე ფოტოები, როგორ არის ნაწამები. სხეულზე ერთ ადგილს ვერ უპოვით, რომ დაზიანებები არ ჰქონდეს. დაწყებული ქვედა კიდურებიდან, დამთავრებული სახემდე. ველოდებით სარჩელის გადაგზავნას. შესაძლოა, ივლისშიც მოხდეს. მთავარია, დასკვნა იყოს თანდართული. იმედი მაქვს, რომ სამართალი იზეიმებს", - განაცხადა გიორგი ტატუნაშვილმა.

არჩილ ტატუნაშვილი 22 თებერვალს, დილით ახალგორიდან გაიტაცეს, 23 თებერვალს, გამთენიისას კი, ოკუპირებული ცხინვალის ინფორმაციით, ის სუნთქვის უკმარისობით გარდაიცვალა. მისი ცხედარი ქართული მხარის მიერ კონტროლირებად ტერიტორიაზე 20 მარტს გადმოასვენეს.

მის ცხედარზე სამხარაულის ექსპერტიზის პასუხი ცნობილი 5 ივნისს გახდა. ექსპერტიზის თანახმად, ტატუნაშვილს 100-მდე დაზიანება ჰქონდა სხეულზე, თუმცა ეს სიკვდილის მიზეზის დასადგენად საკმარისი არ აღმოჩნდა. ჟენევის მოლაპარაკებების 44-ე რაუდნის დროს, რუსეთის საგარეო უწყების ხელმძღვანელის მოადგილემ გრიგორი კარასინმა განაცხადა, რომ ტატუნაშვილის ორგანოები ვლადიკავკაზშია. ქართულმა მხარემ რუსეთს არჩილ ტატუნაშვილის შინაგანი ორგანოების დაუყოვნებლივ გადმოცემისკენ მოუწოდა.