პროკურორი: ზაზა სარალიძე მემუქრებოდა

ხორავას ქუჩაზე მკვლელობის საქმის პროკურორი ზვიად ფხაკაძე აცხადებს, რომ მის მობილურ ტელეფონზე, დროებითი საგამოძიებო კომისიისთვის გუშინ ახსნა-განმარტების  მიცემის დროს, მუქარის შემცველი ტექსტები გაიგზავნა. ამის შესახებ მან საგამოძიებო კომისიის სხდომის დაწყებისას გააკეთა განცხადება. ინფორმაციას 1tv ავრცელებს.

„გუშინ, როდესაც კომისიას ვაძლევდი ახსნა-განმარტებას იმ პროცესში, ჩემს კუთვნილ მობილურ ტელეფონზე შემოვიდა მუქარის შემცველი ტექსტები, რაც უკავშირდებოდა აშკარად ჩემს საპროკურორო საქმიანობას და ასევე, კავშირში იყო იმ ახსნა-განმარტების შინაარსთან, რომელსაც მე კომისიას ვაძლევდი.

აღნიშნულთან დაკავშირებით მივმართე შესაბამისი მოხსენებითი ბარათით კომპეტენტურ პირს და მოხდება სათანადო რეაგირება. ცნობისთვის მინდა იცოდეთ ეს და ის, რომ ჩემს მიერ ახსნა-განმარტების მიცემის პროცესი ხორციელდებოდა გარკვეული პირების მხრიდან კონკრეტული მუქარის შემცველი ტექსტების ქვეშ“, – განაცხადა ფხაკაძემ.

მისი თქმით, კომისიის წევრების მხრიდან შინაარსობრივი მხარით დაინტერესების შემთხვევაში, ის მზადაა ტექსტები კომისიის წევრებს აჩვენოს, ასევე იქიდან გამომდინარე, რომ გზავნილი პირად შეურაცხმყოფელ ტექსტებსაც მოიცავს, ფხაკაძე ამბობს, რომ მას დახურულ სხდომაზე წარადგენს.

„ეს მუქარა ხდებოდა აშკარად ზაზა სარალიძის მიერ“, –  განაცხადა ზვიად ფხაკაძემ.

თავის მხრივ, ამ ფაქტს ზაზა სარალიძეც ეხმიანება. ის On.ge-სთან აცხადებს, რომ პროკურორს აგინა და ამის მიზეზი ხორავას საქმის შესახებ სხდომაზე ფხაკაძის მიერ გაკეთებული განცხადებები იყო.

ზვიად ფხაკაძე შსს-ს წარმომადგენელ კახა სირაძესთან ერთად, გუშინ დროები საგამოძიებო კომისიაზე გამოკითხეს. მათი გამოკითხვა დღესაც გაგრძელდა.

13 ივნისს საგამოძიებო კომისიამ ხორავას ქუჩის საქმეზე დასაკითხი პირების სია გამოაქვეყნა. პარლამენტის დროებითი საგამოძიებო კომისია, რომლის შექმნასაც პარლამენტმა 6 ივნისს უყარა კენჭი, 17 წევრისგან შედგება.

პარლამენტის დროებითი საგამოძიებო კომისიის მანდატის და უფლებამოსილების შესახებ ინფორმაციას შეგიძლიათ გაეცნოთ ამ ბმულზე.