„საექიმო საქმიანობის შესახებ“ კანონში ცვლილებებზე ჯანდაცვის კომიტეტის პოზიცია ცნობილია

საქართველოს კლინიკების ასოციაციის საკანონმდებლო წინადადება, რომლის თანახმადაც „საექიმო საქმიანობის შესახებ“ კანონში ცვლილებების შეტანა იგეგმება, პარლამენტის ჯანმრთელობის დაცვისა და სოციალურ საკითხთა კომიტეტმა უკვე განიხილა. ინფორმციას „ბიზნესპრესნიუსი" ავრცელებს.

როგორც გადაწყვეტილებაში წერია, წინადადება უარყოფითად შეფასდა. თუმცა, კომიტეტის გადაწყვეტილებაში აღნიშნულია, რომ კომიტეტი იზიარებს და ეთანხმება წინადადების ავტორებს, რომ მედიაში სამედიცინო საკითხების ობიექტურად გაშუქების პრობლემაა.

მათი შეფასებით, ხშირად ადგილი აქვს დაუდგენელი და დაუზუსტებელი ინფორმაციის გაშუქებას, სამედიცინო პერსონალის გადაცდომის ან დანაშაულის თაობაზე ისე, რომ არ არის ცნობილი არც ექსპერტიზის დასკვნა და არც სასამართლოს გადაწყვეტილება.

ჯანდაცვის სამინისტროს პოზიციით კი, მოქმედი კანონმდებლობა, გარკვეულწილად უკვე შეიცავს დამოუკიდებელი საექიმო საქმიანობის სუბიექტის სამართლებრივი დაცვის მექანიზმებს და ნორმებს.

„პრობლემები, რომელთა გადაჭრის გზებსაც ინიციატივა წარმოადგენს, მნიშვნელოვანია და კომიტეტი, საკითხის აქტუალურობიდან და სამედიცინო საზოგადოების მოლოდინიდან გამომდინარე, შესაძლებლად მიიჩნევს დაიწყოს მსჯელობა უკვე არსებულ რეგულაციებთან მიმართებაში, ასევე საერთაშორისო გამოცდილების შესწავლისა და საუკეთესო პრაქტიკის დანერგვის კუთხით. 

საკომიტეტო განხილვის შედეგად, საქართველოს კლინიკების ასოციაციის მიერ წარმოდგენილი საკანონმდებლო წინადადება ,,საექიმო საქმიანობის შესახებ“ საქართველოს კანონში ცვლილების შეტანის შესახებ“ და ,,ადმინისტრაციულ სამართალდარღვევათა კოდექსში“ ცვლილებების შეტანის შესახებ’’ უარყოფილად შეფასდა“,- ნათქვამია კომიტეტის გადაწყვეტილებაში. 

საკანონმდებლო წინადადება ასევე გულისხმობს ფულად სანქციებს საავადმყოფოების ტერიტორიაზე საპროტესტო აქციის გამართვის შემთხვევაში. მსგავსი ქმედება პირთა 1000 ლარით; განმეორებითი ქმედების შემთხვევაში კი 2000 ლარით დაჯარიმებას გამოიწვევს. ასევე 1000-ლარიანი ჯარიმა დაეკისრება ადამიანს, რომელიც ექიმს ან მედპერსონალს დაკისრებული მოვალეობის შესრულებაში ხელს შეუშლის. 

შეგახსენებთ, რომ 2017 წლის განმავლობაში 302 ექიმის პასუხისმგებლობის საკითხი დადგა. 207 ექიმს წერილობითი გაფრთხილება მისცეს, ხოლო 93 ექიმს შეუჩერდა საქმიანობის უფლება სხვადასხვა ვადით, 1-დან 4-თვემდე და 2-ს არ დაეკისრა პასუხისმგებლობა.