„ნენსკრა ჰიდრო” სტიქიით დაზარალებულ ჭუბერში ტექნიკას აგზავნის

ნენსკრას ჰიდროელექტროსადგურის პროექტის განმახორციელებელი კომპანია „ნენსკრა ჰიდრო” დღეს მესტიის მუნიციპალიტეტში, სტიქიით დაზარალებულ სოფელ ჭუბერში მძიმე ტექნიკის რვა ერთეულს აგზავნის. ამის შესახებ 1tv წერს.

„ნენსკრა ჰიდროს” ცნობით, 2018 წლის დასაწყისიდან დღემდე ნენსკრა ჰესის მოსამზადებელი სამუშაოები, რომლებიც არსებული გზებისა და ხიდების რეაბილიტაციას გულისხმობს, დროებით შეჩერებელი იყო, თუმცა მიმდინარეობდა და დღესაც მიმდინარეობს აქტიური მუშაობა სოციალური პროექტებისა და მიწის გამოსყიდვაზე.

„სამომავლოდ ხეობაში კაშხლის არსებობა შესაძლებლობას მოგვცემს, მსგავსი სტიქიური მოვლენების შემთხვევაში მდინარის კალაპოტში წყლის რაოდენობა ეფექტურად გაკონტროლდეს, რაც მოსახლეობისა და ინფრასტრუქტურისთვის ზიანის მიყენების რისკს მაქსიმალურად შეამცირებს“, – აცხადებს „ნენსკრა ჰიდროს“ ოპერაციების მართვის დირექტორი თეიმურაზ კოპაძე.

ჭუბერის ხეობა სტიქიის ზონაა. მდინარე ნენსკრას კალაპოტი აღარ აქვს. ამ დროისთვის წყლის დონემ ისევ მოიმატა, მდინარეს ხეები და შლამი მოაქვს. 

5 ივლისის სტიქიის შედეგად სოფელი ჭუბერი გზის მთავარ მაგისტრალს მოწყდა.

სტიქიის ზონაში მთელი ღამის განმავლობაში მუშაობდნენ საგანგებო სიტუაციების მართვის სამსახურის მაშველები.

ადგილზე მობილიზებული იყო მძიმე ტექნიკა, ასევე ცოცხალი ძალაც. განხორციელდა მოსახლეობის ევაკუაცია.