ე.წ. ოთხოზორია-ტატუნაშვილის სიას შესაძლოა, რამდენიმე ადამიანი დაემატოს

ე.წ. ოთხოზორია-ტატუნაშვილის სიას შესაძლოა, რამდენიმე ადამიანი დაემატოს. ამის შესახებ ინფორმაციას გაზეთი „კვირის პალიტრა“ ავრცელებს. გამოცემის ცნობით, სიაში მოხვედრის ერთ-ერთი კანდიდატია ცხინვალის ე.წ. მილიციის პოლკოვნიკი, „ომონელი“ აზიმრატ ჯიოევი, რომელიც მუდმივად ავიწროებდა ახალგორელ ქართველებს. 

საუბარია გიორგი ქაბულოვზეც, რომელიც კოკოითის ე.წ. პრეზიდენტობის წლებში „ომონის“ მეთაური გახლდათ და ქართველების მიმართ განსაკუთრებული სისასტიკისთვის ჯილდოც დაიმსახურა.

ასევე, გენერალ-მაიორ მერაბ ფუხაევი. მას არაერთხელ დაურბევია ქართველი მოსახლეობა და არსებობს ეჭვი, რომ ტატუნაშვილისა და უფრო ადრე დავით ბაშარულის მკვლელობა სწორედ მის კისერზეა. 

არსებული ინფორმაციით, ამ სიას რამდენიმე ადამიანი დაემატება აფხაზეთიდანაც. კერძოდ, ერთ-ერთი მათგანია გარიკ სამანბა, რომელიც ომის დასრულების შემდეგ კონტროლის პალატის თანამშრომელი იყო და ასევე მისი თანამებრძოლელი ბესლან კვიწინია, ბესლან ტორჩუა და ზაურ ადლეიბა. სამანბა 1992-93 წლებში ომის მოტომსროლელთა ბრიგადას მეთაურობდა. აქვს აფხაზეთის ეროვნული გმირის წოდება. აქტიურად მონაწილეობდა ქართველთა ეთნოწმენდაში, მის სახელს უკაშირდება გაბელიას წამება, რომელიც ქართველ მეომრებს ეხმარებოდა, მალავდა დაჭრილებს... სამანბა 90-იანი წლების გალის მოვლენებშიც მონაწილეობდა.

„ქართველთა მიმართ განსაკუთრებული სისასტიკით გამოირჩეოდა აფხაზი საველე მეთაური ზაკან ნანბა (მოგვიანებით, ალექსანდრე ანქვაბის პირადი მრჩეველი იყო). ქართველებზე მონადირე ერთ-ერთი დაჯგუფების წევრი და გადაწყვეტილების მიმღები პირი იყო ვიტალი სმირიც, რომლის სახელსაც უკავშირდება ომის პერიოდშიც და შემდგომაც ქართველების მიმართ არაადამიანური მოპყრობა. მათი დაჯგუფება ტყვიის დასაზოგად ცოცხალ ადამიანებს ჭაში ყრიდა...

კიდევ ერთი ვეტერანი ზაურ ადლეიბაა. ის აფხაზეთის ომში ბატალიონ „კასკადის“ მეთაური იყო. 2005-2007 წლებში ოჩამჩირის ადმინისტრაციაში მუშაობდა და გალსა თუ ოჩამჩირეში ვითარების გაკონტროლებას ცდილობდა. აქტიურად მონაწილეობდა გალის მოვლენებში და მის სახელს ქართველების წინააღმდეგ ჩადენილი არაერთი დანაშაული უკავშირდება;

აფხაზეთის ომის მონაწილე ლავრები მიქვაბია 2008 წელს გალის რაიონის ე.წ. ძალოვანი სტრუქტურების კოორდინატორად მუშაობდა და ადმინისტრაციული საზღვრის კონტროლზეც მიუწვდებოდა ხელი. მიქვაბია ე.წ. საზღვრის დარღვევების გამო მუდმივად აჯარიმებდა, აპატიმრებდა და აწამებდა ქართველებს. მის სახელს უკავშირდება გალის რაიონის სოფელ მეორე ოტობაიიდან 50 ქართული ოჯახის გაძევებაც. 2008 წლის 15 ნოემბერს ქართულ-აფხაზურ ადმინისტრაციულ საზღვართან ორმხრივი სროლის შედეგად შსს-ს თანამშრომელი, 33 წლის ზურაბ ჯეჯელავა დაიღუპა. აფხაზურმა შეიარაღებულმა ფორმირებებმა ქართველ სამართალდამცველებს ცეცხლი მაშინ გაუხსნეს, როცა ისინი სოფელ ქალაღალის მიმართულებით პატრულირებდნენ... თვითმხილველის ინფორმაციით, მანქანიდან გადმოსულ ბარძაყში დაჭრილ ახალგაზრდას ახლო მანძილიდან თავში ესროლეს. თავდასხმას მიქვაბია მეთაურობდა“, - წერს გამოცემა.

სიას, სავარაუდოდ, დაემატებიან მამა-შვილი ვიაჩესლავ და ახრა კვეკვესკირები. აფხაზეთის ომის დასრულების შემდეგ ოჩამჩირის რაიონის ადმინისტრაციის უფროსის მოადგილედ დანიშნეს. 2010 წელს კი მისი გავლენით გალის #2 სკოლის დირექტორად მისი შვილი ახრა კვეკვესკირი დაინიშნა. ახალგაზრდა კვეკვესკირი ყოველგვარი ქართულის მიმართ ისეთი აგრესიული იყო, რომ ქართველ მოსწავლეებთან მუდმივი კონფლიქტი ჰქონდა. ერთხელ ის უფროსკლასელებმა სცემეს. მამა-შვილმა კვეკვესკირებმა 20-ზე მეტი მოსწავლე გალის მილიციაში დაასმინეს. ყველა მათგანი აღრიცხვაზე აიყვანეს. ახრა კვეკვესკირმა 2011 წელს გალალები გააფრთხილა, რომ ბუნტის განმეორების შემთხვევაში ქართული ენის სწავლება აიკრძალებოდა. ორი წლის შემდეგ ის ე.წ. დეპუტატი გახდა, 2015 წელს კი გალის სკოლებში ქართული ენის სწავლება აიკრძალა.

„მამა-შვილის შავ საქმეებში ჩართული იყო ოჩამჩირის ადმინისტრაციის უფროსი ბესლან ახუბა, რომელიც აფხაზეთის ომის მონაწილეა. ის დღემდე წილებს იღებს ადამიანების გატაცებიდან და ნარკობიზნესიდან. მისი გავლენა, ძირითადად, გალისა და ოჩამჩირის საზღვარზე არსებულ სოფლებზე ვრცელდება“, - წერს „კვირის პალიტრა“

26 ივნისს პრემიერმინისტრმა მამუკა ბახტაძემ „ოთხოზორია-ტატუნაშვილის შავ სიაში“ 33 ადამიანის შეყვანის შესახებ განაცხადა. „ოთხოზორია-ტატუნაშვილის შავ სიას“ აფხაზეთის საოკუპაციო რეჟიმმა საქართველოს მთავრობის დესტრუქციული ქმედება უწოდა. 

2017 წლის 5 მარტს პარტია „ევროპულმა საქართველომ“ საპარლამენტო უმრავლესობას არჩილ ტატუნაშვილთან დაკავშირებით რეზოლუციის საერთო დოკუმენტის შექმნა შესთავაზა. 21 მარტს, საქართველოს პარლამენტმა რეზოლუციის პროექტი 106 ხმით დაამტკიცა.

რეზოლუციის ერთ-ერთი მთავარი კომპონენტი სანქციების ნაწილი, ანუ „ოთხოზორია-ტატუნაშვილის სიის“ შექმნა იყო. რეზოლუციის თანახმად, სიაში უნდა შეეყვანათ ოკუპირებულ ტერიტორიებზე საქართველოს მოქალაქეთა მკვლელობაში, გატაცებაში, წამებასა და არაჰუმანურ მოპყრობაში, ჯანმრთელობის მძიმე დაზიანებასა და დანაშაულის დაფარვაში ბრალდებული და მსჯავრდებული პირები.

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, ოკუპირებული ცხინვალის ინფორმაციით, ის თითქოს სუნთქვის უკმარისობით გარდაიცვალა. ნაწამები ტატუნაშვილის ცხედარი ქართულ მხარეს 26-დღიანი ლოდინის შემდეგ გადმოსცეს.

გიგა ოთხოზორია ოკუპირებული გალის რაიონის სოფელ ნაბაკევის მოსაზღვრე ზუგდიდის სოფელ ხურჩაში 2016 წლის 19 მაისს მოკლეს.სასამართლომ მისი მკვლელი დაუსწრებლად დამნაშავედ ცნო და 14 წლით თავისუფლების აღკვეთა მიუსაჯა.