ზაზა სარალიძე: პროკურატურისგან მაინტერესებს, რატომ უსმენდა ჩემი და ჩემი მეუღლის ტელეფონებს

ხორავას ქუჩაზე მოკლული ერთ-ერთი მოზარდის მამა ზაზა სარალიძე  მთავარ პროკურატურაში შეხვედრაზე მივიდა. როგორც სარალიძე ამბობს, შეხვედრას სახალხლო დამცველის და შსს-ის წარმომადგენლები დაესწრებიან. ზაზა სარალიძეს აინტერესებს რა ბრალდებით იშუამდგომლა პროკურატურამ მოსამართლესთან რათა მისი და მისი მეუღლის სატელეფონო ზარების მოსმენის უფლება მიეღო. ინფორმაციას "ლიბერალი" ავრცელებს.

ზაზა სარალიძეს იმედი აქვს, რომ შეხვედრას ახალი მთავარი პროკურორი შალვა თადუმაძეც დაესწრება.

"ეს შეხვედრა 7 ივლისს უნდა გამართულიყო, 10 დღის ვადა ითხოვეს, რათა კონკრეტული ნაბიჯები გადაედგათ, გავიდა ეს 10 დღე და მოვედი ისევ, შევხვდები, ალბათ იმ პირებს, რომლებიც წინა შეხვედრას ესწრებოდნენ - საქმის პროკურორები, ახალი პროკურორები, გენერალური პროკურორის მოადგილე და იმედია, გენერალურ პროკურორსაც შევხვდები. 

რა კითხვებიც 7-ში დავსვი, ზუსტად ამ კითხვებზე უნდა მივიღო შეკითხვები. ამ კითხვების განცხადებისგან ჯერ თავს შევიკავებ, მაგრამ ერთი რამე მინდა აღვნიშნო 1 დეკემბრის ინციდენტში მონაწილე ბავშვებიდან არც ერთის ტელეფონი არ ყოფილა ამოღებული და არც ერთის სატელეფონო საუბრები არ იყო მოსმენაზე დასმული. როგორც გაირკვა, მე და ჩემი მეუღლე თურმე დაგვსვეს ოფიციალურად მოსმენაზე და ამ კითხვაზეც უნდა მივიღო პასუხი - მე და ჩემს მეუღლეს რა ბრალდება წაგვიყენეს, რა ბრალდებთ იშუამდგომლეს მოსამართლესთან და დაიწყეს ჩვენი მოსმენა“, - განაცხადა ზაზა სარალიძემ. 

ზაზა სარალიძემ 2-დან 3 ივლისის ღამე შსს-ს ეზოში პროტესტის ნიშნად გაათენა. ის მოზარდების მკვლელობის საქმის მოწმის მ.კ-ს დაკავებას მოითხოვდა.

ხორავას ქუჩაზე მოზარდების, დავით სარალიძის და ლევან დადუნაშვილის მკვლელობის საქმეზე ორი ბრალდებულის მიმართ თბილისის საქალაქო სასამართლოს მოსამართლემ განაჩენი 31 მაისს გამოიტანა. განაჩენის თანახმად დავით სარალიძის მკვლელობა არცერთს არ დაუდასტურდა. კერძოდ, ერთ-ერთი ბრალდებული დავით სარალიძის მკვლელობის ნაწილში გაამართლა და ის მოსამართლემ დამნაშავედ ცნო ლევან დადუნაშვილის მკვლელობაში, ხოლო მეორე ბრალდებულს ბრალი გადაუკვალიფიცირა და სარალიძის მკვლელობის მცდელობაში ცნო დამნაშავედ. ზაზა სარალიძე თავისი შვილის მკვლელის იდენტიფიცირებას და დასჯას ითხოვს. 

31 მაისს თანამდებობიდან გადადგა მთავარი პროკურორი ირაკლი შოთაძე, მას შემდეგ რაც მოსამართლის განაჩენს პროკურატურის მიმართ საპროტესტო გამოსვლები მოჰყვა. პარლამენტში კი ამ საქმეზე დროებითი საგამოძიებო კომისია შეიქმნა, რომელსაც ოპოზიციონერი სერგი კაპანაძე ხელმძღვანელობს.

51-ე სკოლის ორი მოსწავლე დავით სარალიძე და ლევან დადუნაშვილი ხორავას ქუჩაზე 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.