კობახიძე: საჭიროების შემთხვევაში, მაღალჩინოსნების გამოკითხვას პარლამენტი გაუწევს ზედამხედველობას

პარლამენტის თავმჯდომარე ირაკლი კობახიძე მთავარი პროკურატურის მიერ დიმიტრი ქუმსიშვილისა და ზურაბ ალავიძის გამოკითხვის ფაქტს ეხმიანება. კობახიძის განცხადებით, თუ ყოფილი მაღალჩინოსნების გამოკითხვის პროცესზე ზედამხედველობა გახდება საჭირო, პარლამენტი ამას გააკეთებს.

“ეს ყველაფერი არის თავიდან ბოლომდე, რა თქმა უნდა, სამართალდამცავი ორგანოების საქმე. თუ მათ გაუჩნდათ კითხვები ორი კონკრეტული ყოფილი თანამდებობის პირის მიმართ, ისინი დასვამენ კითხვებს და მათ გაეცემა პასუხები", - განაცხადა კობახიძემ.

კითხვაზე შესაძლოა თუ არა შეკითხვები კვირიკაშვილის მიმართაც დაისვას, კობახიძის თქმით, ეს სამართალდამცველების გადასაწყვეტია. 

"როდესაც საქმე ეხება გამოძიებას თუ იქ ჩართულნი არიან ყოფილი თანამდებობის პირები, აქ, ბუნებრივია, ძალიან ადვილია სპეკულირება და მოსალოდნელიც იყო, რომ ამ ყველაფერს მოყვებოდა პოლიტიკური სპეკულაციები ოპოზიციის მხრიდან", - განაცხადა ირაკლი კობახიძემ.

საქართველოს პროკურატურაში ყოფილი მინისტრების, დიმიტრი ქუმსიშვილისა და ზურაბ ალავიძის საქმიანობაზე გამოძიება მიმდინარეობს. 

21 ივლისს ცნობილი გახდა, რომ პროკურატურა ეკონომიკის სამინისტროში, აკრედიტაციის ეროვნულ ცენტრსა და სახმელეთო ტრანსპორტის სააგენტოში სხვადასხვა საკითხით ინტერესდება და შესაბამის სამართლებრივ პროცედურებს იწყებს.

დიმიტრი ქუმსიშვილი საქართველოს მთავრობაში 2012 წლის ბოლოს, საპარლამენტო არჩევნებში საარჩევნო ბლოკის „ქართული ოცნება“ გამარჯვების შემდეგ მივიდა და ეკონომიკის მინისტრად დაინიშნა. მანამდე ის ძირითადად საბანკო სექტორში მუშაობდა, მათ შორის 1997-2011 წლებში „ბანკი ქართუს“ ჯერ ხაზინის უფროსად, შემდეგ კი გენერალური დირექტორის პირველ მოადგილედ. ეკონომიკის მინისტრი ქუმსიშვილი 2015 წელს ვიცეპრემიერიც გახდა. 2016 წელს ის ფინანსთა მინისტრად დაინიშნა და პირველი ვიცეპრემიერის თანამდებობაც შეინარჩუნა, ხოლო 2017 წელს კვლავ ეკონომიკის და მდგრადი განვითარების მინისტრის პოზიციაზე დაბრუნდა და ეს თანამდებობა პრემიერმინისტრ გიორგი კვირიკაშვილის გადადგომის შემდეგ დატოვა. მალევე ცნობილი გახდა, რომ ახალი პრემიერის მამუკა ბახტაძის დროებით სამთავრობო გუნდში მისი კანდიდატურა აღარ მოიაზრებოდა.

რაც შეეხება რეგიონული განვითარებისა და ინფრასტრუქტურის ყოფილ მინისტრს ზურაბ ალავიძეს, ის ამ თანამდებობაზე 2016 წლის ნოემბერში დაინიშნა. მანამდე ალავიძე მთავრობის ადმინისტრაციაში მუშაობდა. მან თანამდებობა 2018 წლის 30 მარტს დატოვა, მის ადგილზე მაია ცქიტიშვილი დაინიშნა. ცქიტიშვილმა მინისტრის პორტფელი მამუკა ბახტაძის ახალ, მცირე მთავრობაშიც შეინარჩუნა. ამასთან, მაია ცქიტიშვილი 17 ივლისს ვიცეპრემიერად დაინიშნა.