წულუკიანი გვენეტაძეზე: აუცილებლად ვაპირებ მასთან საუბარს

იუსტიციის მინისტრი თეა წულუკიანი ნინო გვენეტაძის გადადგომის გადაწყვეტილებას ეხმიანება და ამბობს, რომ ამის შესახებ მედიისგან გაიგო. კითხვაზე, ხომ არ უკავშირდება მისი ეს გადაწყვეტილება შიდა პროცესებს, ან ციანიდის საქმეზე დაკავებულ დეკანოზ გიორგი მამალაძის საქმეს, მინისტრი ორივე საკითხთან კავშირს გამორიცხავს.

წულუკიანის თქმით, ის აუცილებლად დაელაპარაკება ნინო გვენეტაძეს.

„მე მასთან რამდენიმე კვირაა არ მქონია არც სატელეფონო კონტაქტი და დღეს სიურპრიზად, მედიის საშუალებით შევიტყვე მისი ეს გადაწყვეტილება და აუცილებლად ვაპირებ მასთან საუბარს, რა ტიპის პრობლემები აქვს, მოვიკითხო ადამიანურად და ვუსურვო ჯანმრთელობა და წარმატებები“, - განაცხადა თეა წულუკიანმა.

პირველ აგვისტოს ცნობილი გახდა, რომ უზენაესმა სასამართლომ დეკანოზ გიორგი მამალაძის საქმეზე ზეპირი მოსმენის გარეშე წარმოებაში არ მიიღო დეკანოზ გიორგი მამალაძისა და პროკურატურის საჩივრები და პირველი ინსტანციის განაჩენი, რომლითაც მამალაძეს თავისუფლების აღკვეთა შეეფარდა, ძალაში დატოვა.

უზენაესი სასამართლოსა და იუსტიციის უმაღლესი საბჭოს თავმჯდომარემ ნინო გვენეტაძემ თანამდებობიდან წასვლის შესახებ განცხადება დღეს გაავრცელა. 

მისი გადაწყვეტილება მოულოდნელი აღმოჩნდა, როგორც იუსტიციის უმაღლესი საბჭოს წევრებისთვის, ასევე პოლიტიკოსებისთვის.

2017 წლის ნოემბერში ნინო გვენეტაძეს და იუსტიციის უმაღლესი საბჭოს წევრებს შორის მოსამართლეთა უვადო დანიშნვნასთან დაკავშირებით კონფლიქტი წარმოიქმნა.  მაშინ ვრცელდებოდა ინფორმაცია, რომ ამ დაპირისპირების გამო გვენეტაძემ თანამდებობიდან წასვლა გადაწყვიტა, რაც არ დადასტურდა და მან 34 მოსამართლის უვადოდ დანიშვნას ხელი მოაწერა.

ნინო გვენეტაძე უზენაესი სასამართლოს თავმჯდომარის პოსტზე საქართველოს პარლამენტმა 2015 წლის 20 მარტს აირჩია. მან ამ პოზიციაზე კოტე კუბლაშვილი შეცვალა. უზენაესი სასამართლოს თავმჯდომარის კანდიდატად გვენეტაძე პრეზიდენტმა გიორგი მარგველაშვილმა შეარჩია და პარლამენტს წარუდგინა.

საქართველოს უზენაესი სასამართლოს თავმჯდომარეს კონსტიტუციის მოქმედი რედაქციით წარადგენს ისევ საქართველოს პრეზიდენტი და ირჩევს საქართველოს პარლამენტი 10 წლის ვადით. პრეზიდენტს კანდიდატის წარდგენა ხვალვე შეუძლია, პარლამენტს კი მისი დამტკიცება - რიგგარეშე ან საშემოდგომო სესიაზეც. თუ პროცედურა გაჭიანურდა საპრეზიდენტო არჩევნებამდე და უზენაესი სასამართლოს ახალ თავმჯდომარეს პარლამენტი 2018 წლის ოქტომბრამდე არ აირჩევს, ახალი პრეზიდენტის ინუგურაციის შემდეგ ამოქმედდება ახალი კონსტიტუცია, რომელიც უზენაესი სასამართლოს თავმჯდომარის არჩევის განსხვავებულ პროცედურას ითვალისწინებს. მას 10 წლის ვადით ისევ პარლამენტი ამტკიცებს, მაგრამ არა პრეზიდენტის, არამედ უზენაესი სასამართლოს წევრთანაგან იუსტიციის უმაღლესი საბჭოს წარდგინებით. სასამართლოს ახალი ხელმძღვანელის არჩევამდე უზენაესი სასამართლოს თავმჯდომარის მოვალეობას ასრულებს მისი პირველი მოადგილე.