ნინო გვენეტაძის გადადგომას იუსტიციის უმაღლეს საბჭოში აფასებენ

უზენაესი სასამართლოსა და იუსტიციის უმაღლესი საბჭოს თავმჯდომარე ნინო გვენეტაძემ თანამდებობა დატოვა. განცხადება უზენაესი სასამართლოს ვებგვერდზე გამოქვეყნდა.

გვენეტაძეემ გადადგომის მიზეზად ჯანმრთელობის მდგომარეობა და საზღვარგარეთ რამდენიმეთვიანი მკურნალობის საჭიროება დაასახელა.

განცხადებაში უზენაესი სასამართლოს ყოფილი თავჯდომარე 2015 წლის 20 მარტიდან დღემდე სისტემაში გატარებულ რეფორმებსაც მიმოიხილავს.

ნინო გვენეტაძის გადაწყვეტილებას უკვე გამოეხმაურნენ იუსტიციის უმაღლესი საბჭოს წევრები. საბჭოს მდივანი გიორგი მიქაუტაძე ამბობს, რომ არის მცდელობა პოლიტიკურ ჭრილში გადაიტანონ სასამართლოში მიმდინარე მოვლენები: "გარკვეულ თემებზე განსხვავებული მოსაზრება გვქონდა, თუმცა ბოლო პერიოდში ჩვენი ხედვები მაქსიმალურად დაახლოებული იყო. ჩვენ გადასული ვიყავით მაქსიმალურად კონსტრუქციულ რეჟიმში და ბოლო პერიოდში მიღებული გადაწყვეტილებებიც ამაზე მეტყველებს", - თქვა გიორგი მიქაუტაძემ.

არამოსამართლე წევრი ანა დოლიძე აცხადებს, რომ უზენაესი სასამართლოს თავმჯდომარის თანამდებობიდან წასვლის გადაწყვეტილება მისთვის მოულოდნელი იყო. 

კიდევ ერთი არამოსამართლე წევრი ნაზი ჯანეზაშვილის თქმით, კი უზენაეს სასამართლოს გვენეტაძე ფორმალურად მართავდა, რეალური მმართველი კი მიხეილ ჩინჩალაძე იყო.

გვენეტაძის გადადგომა მოულოდნელი აღმოჩნდა პრემიერმინისტრ მამუკა ბახტაძის მრჩევლისთვის, სოზარ სუბარისთვის. 

უზენაესი სასამართლოს თავმჯდომარის მოვალეობას ნინო გვენეტაძის პირველი მოადგილე მზია თოდუა შეასრულებს, ხოლო იუსტიციის საბჭოს თავჯდომარის ფუნქციებს იუსტიციის საბჭოს მდივანი გიორგი მიქაუტაძე შეითავსებს.

ნინო გვენეტაძე უზენაესი სასამართლოს თავმჯდომარის პოსტზე საქართველოს პარლამენტმა 2015 წლის 20 მარტს აირჩია. მან ამ პოზიციაზე კოტე კუბლაშვილი შეცვალა. უზენაესი სასამართლოს თავმჯდომარის კანდიდატად გვენეტაძე პრეზიდენტმა გიორგი მარგველაშვილმა შეარჩია და პარლამენტს წარუდგინა.

საქართველოს უზენაესი სასამართლოს თავმჯდომარეს კონსტიტუციის მოქმედი რედაქციით წარადგენს ისევ საქართველოს პრეზიდენტი და ირჩევს საქართველოს პარლამენტი 10 წლის ვადით. პრეზიდენტს კანდიდატის წარდგენა ხვალვე შეუძლია, პარლამენტს კი მისი დამტკიცება - რიგგარეშე ან საშემოდგომო სესიაზეც. თუ პროცედურა გაჭიანურდა საპრეზიდენტო არჩევნებამდე და უზენაესი სასამართლოს ახალ თავმჯდომარეს პარლამენტი 2018 წლის ოქტომბრამდე არ აირჩევს, ახალი პრეზიდენტის ინუგურაციის შემდეგ ამოქმედდება ახალი კონსტიტუცია, რომელიც უზენაესი სასამართლოს თავმჯდომარის არჩევის განსხვავებულ პროცედურას ითვალისწინებს. მას 10 წლის ვადით ისევ პარლამენტი ამტკიცებს, მაგრამ არა პრეზიდენტის, არამედ უზენაესი სასამართლოს წევრთანაგან იუსტიციის უმაღლესი საბჭოს წარდგინებით. სასამართლოს ახალი ხელმძღვანელის არჩევამდე უზენაესი სასამართლოს თავმჯდომარის მოვალეობას ასრულებს მისი პირველი მოადგილე.