შოთაძე: გამოძიებით დადგინდა, რომ მირზა სუბელიანის შვილი მკვლელობაში არ მონაწილეობდა

დღეს პარლამენტის დროებით საგამოძიებო კომისიის სხდომაზე ხორავას ქუჩაზე მომხდარი მკვლელობის საქმის გამოძიების დეტალებზე ყოფილი მთავარი პროკურორი ირაკლი შოთაძე გამოიკითხა.

კომისიის თავმჯდომარის სერგი კაპანაძის შეკითხვაზე, შესრულებულად თვლის თუ არა ის მის მიერ გაცემულ დავალებას, მიუხედავად იმისა, რომ რიგი საგამოძიებო მოქმედებები არ ჩატარებულა, ირაკლი შოთაძემ უპასუხა, რომ ის დავალებას შესრულებულად მიიჩნევს:

„მე ვთვლი, რომ მივიღე სრული ინფორმაცია მკვლელობაში მირზა სუბელიანის შვილის შესაძლო მონაწილეობის შესახებ. შესაბამისად, ჩემი დავალება შესრულებულია, მე რაც მაინტერესებდა კონკრეტულ ფაქტთან დაკავშრებით, ეს გავიგე. ჩატარდა ყველა საჭირო საგამოძიებო და საპროცესო მოქმედება და დადგინდა, რომ მირზა სუბელიანის შვილს არანაირი შემხებლობა რა ჰქონდა ჩადენილ მკვლელობასთან,“ - განაცხადა ირაკლი შოთაძემ.

მანამდე, ქვეყნის ყოფილმა მთავარმა პროკურორმა აღნიშნა, რომ გამოძიება არ არის მათემატიკა, რომ დაჯდე და განტოლება ამოხსნა, გამოძიება კომპლექსური პროცესია.

სხდომაზე კომისიის წევრი ირაკლი აბესაძე დაინტერესდა, ხორავას ქუჩაზე მკვლელობის საქმის ფარგლებში მოსთხოვა თუ არა ირაკლი შოთაძემ პროკურორებს, დაეკითხათ მირზა სუბელიანი.

„მე დავავალე შესაბამის კურატორ მოადგილეს და ქალაქის პროკურორს, რომ გაერკვიათ მირზა სუბელიანის შვილის როლი და მონაწილეობის ხარისხი შესაბამის ინციდენტში, დაედგინა მას, რა ქმედება ჰქონდა განხორციელებული და ეს იყო ჩემი დავალება. ეს გულისხმობს, რომ უნდა ჩატარებულიყო შესაბამისი საგამოძიებო და საპროცესო მოქმედებები, რაც ამ მიზნის განსახორციელებლად იყო საჭირო. რაც შეეხება დეტალებს, რა საგამოძიებო თუ საპროცესო მოქმედებები იყო საჭირო, ყველა რიგითი პროკურორით დაწყებული, დამთავრებული ჩემი მოადგილით, არიან ძალიან კომპეტენტური, გამოცდილი პროკურორები და კარგად იციან, რა საგამოძიებო და საპროცესო მოქმედებები უნდა ჩატარდეს, როგორ უნდა განახორციელონ საპროცესო ხელმძღვანელობა”, - განაცხადა კომისიის სხდომაზე ირაკლი შოთაძემ.

დღესვე საგამოძიებო კომის​ია შინაგან საქმეთა მინისტრს გიორგი გახარიას და იუსტიციის მინისტრს თეა წულუკიანს გამოკითხავს.

ირაკლი შოთაძე მთავარი პროკურორის თანამდებობიდან ხორავას ქუჩაზე მომხდარი მკვლელობის საქმის გამოძიების გამო გადადგა.   

საგამოძიებო კომისია უკვე ფინალურ ეტაპამდეა მისული. კომისიას გამოკითხული ჰყავს 70-ზე მეტი პირი. დასკვნა, სავარაუდოდ, სექტემბრის დასაწყისში გამოქვეყნდება. 

პარლამენტში ხორავას ქუჩაზე მოკლული ორი მოზარდის საქმესთან დაკავშირებით პარლამენტის დროებითი საგამოძიებო კომისია 6 ივნისს შეიქმნა.

პარლამენტის საგამოძიებო კომისიის პარალელურად, გამოძიებას ხელახლა აწარმოებს შინაგან საქმეთა სამინისტრო. 

ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი  გამოაცხადა,  რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.

მთავარი პროკურორი ირაკლი შოთაძე, რომლის უწყების პოზიციაც სასამართლომ ბოლომდე არ გაიზიარა,  თანამდებობიდან გადადგა. მკვლელობის საქმეზე ახალი გარემოებების დადგენის მიზნით, შსს-მ ხელახალი გამოძიება დაიწყო, რომელსაც უშუალოდ გიორგი გახარია ხელმძღვანელობს. ამავდროულად, შეიქმნა პარლამენტის დროებითი საგამოძიებო კომისია, რომელიც 17 წევრისგან შედგება.