რატიანის ინიციატივა დეპუტატებმა არ გაიზიარეს

ადამიანის უფლებათა დაცვის კომიტეტის სხდომაზე დეპუტატებს შორის სიტყვიერი დაპირისპირება მოხდა. კამათი სერგო რატიანსა და გედევან ფოფხაძეს შორის რატიანის განცხადებას მოჰყვა, რომელმაც ფრაქცია "ევროპული საქართველოს" სახელით  დააყენა ინიციატივა, რომ დეპუტატებს ბათუმში განვითარებულ მოვლენებზე ემსჯელათ. კომიტეტმა ეს ინიციატივა არ გაიზიარა.

მიუხედავად იმისა, რომ საკითხი სხდომის დღის წესრიგში არ ყოფილა, რატიანის აზრით, მისი განხილვა მნიშვნელოვანი იქნებოდა. „სრულიად წარმოუდგენელია, დღეს ადამიანის უფლებათა დაცვისა და სამოქალაქო ინტეგრაციის კომიტეტის სხდომა იმართებოდეს და არ იყოს საუბარი ბათუმში განვითარებულ მოვლენებზე.  უნდა ყოფილიყო შეფასებები და შემდგომ ქმედებებზე გვემსჯელა, მაგრამ უმრავლესობის მხრიდან პასუხი იყო, რომ კომიტეტის მიღმა, სამუშაო ვითარებაში დავგეგმოთ რაღაცეები“, - განაცხადა სერგო რატიანმა.

მისივე შეფასებით, ბათუმში განვითარებულ მოვლენებზე პასუხისმგებლობა ცალსახად ხელისუფლებას ეკისრება.

ბათუმში ვითარება 11 მარტს, საღამოს ჭავჭავაძის ქუჩაზე მომხდარი ინციდენტისას დაიძაბა. პოლიციამ 2 მოქალაქე მას შემდეგ დააკავა, რაც პატრულის თანამშრომელმა ერთ-ერთი მათგანი დააჯარიმა, რასაც იქ მყოფ მოქალაქეებსა და პოლიციელებს შორის დაპირისპირება მოჰყვა. მოგვიანებით, პოლიციამ გოგებაშვილის ქუჩაზე მიმდინარე აქციაზე კიდევ 4 პირი დააკავა.

აქციის მონაწილეებმა ქალაქის პოლიციის სამმართველოსთან გადაინაცვლეს. აქციაზე შეკრებილები დაკავებული პირების გათავისუფლებას, საპატრულო პოლიციის უფროსის გადადგომას და, აგრეთვე, პატრულის მიერ ჯარიმების გახშირებული დაწერის ფაქტებს აპროტესტებდნენ.

აჭარის პოლიციის სამმართველოს წინ აქციაზე მოგვიანებით სპეცრაზმი გამოჩნდა. მას აქციის მონაწილეებმა ქვები დაუშინეს და უკან, ეზოში შეაბრუნეს. სპეცრაზმმა შაშხანებით და ცრემლსადენი გაზით დაიწყო აქციის მონაწილეთა დაშლა. აქციის მონაწილეები მცირე ხნით დაიშალნენ, თუმცა, ისინი კვლავ სამმართველოს წინ შეიკრიბნენ და ეზოში შესვლას ცდილობდნენ.