საგანგებო სიტუაციების სამსახურის მოთხოვნაზე სასტუმრო „ლეოგრანდის“ პოზიცია ამ დრომდე უცნობია

სასტუმრო „ველმონდის” (ყოფილი „ლეოგრანდის“) ადმინისტრაციას სასტუმროს დასაცლელად ერთი დღე რჩება, თუმცა მენეჯმენტი ამ დრომდე დუმს.

განცხადება ადმინისტრაციას პირველ საათზე უნდა გაეკეთებინა, თუმცა მათი პოზიცია საგანგებო სიტუაციების მართვის სააგენტოს მოთხოვნაზე ჯერ კიდევ უცნობია.

დღეს ითქვა მხოლოდ ის, რომ სასტუმროში, რომელშიც ოფიციალური ცნობით, სახანძრო უსაფრთხოების ნორმები დარღვეულია,  ამ წუთებშიც 300-მდე დამსვენებელი იმყოფება. 

15 აგვისტოს საგანგებო სიტუაციების მართვის სამსახურმა სასტუმროს ადმინისტრაციას სტუმრების გასაყვანად და საქმიანობის შესაჩერებლად ვადა 17 აგვისტოს 18:00 საათამდე მისცა. 

უწყების ცნობით, მათმა სპეციალისტებმა, 2018 წელს სასტუმრო და სამორინე ველმონდში (ყოფილ ლეოგრანდში) სახანძრო უსაფრთხოების მიზნით, სამჯერ განახორციელეს (დეტალური, საკონტროლო და მიზნობრივი) სახანძრო-ტექნიკური შემოწმება. გაიცა 43 რეკომენდაცია, რომელთა უმეტესობა ამ დრომდე არ შესრულებულა.

10 ივლისს სასტუმრო „ლეოგრანდს“ საქმიანობის უფლება შეუჩერდა.

ბათუმში, სასტუმრო „ლეოგრანდში“ ხანძრის შედეგად დაღუპულია 11 ადამიანი, მათგან საქართველოს 10 და ირანის ერთი მოქალაქე. დაშავდა 21 ადამიანი, მათგან ერთი ისრაელის მოქალაქეა, 5 კი - თურქეთის.

ხანძარი სასტუმროში 24 ნოემბერს, დაახლოებით 20:00 საათზე გაჩნდა.