მარგველაშვილი უზენაესი სასამართლოს თავმჯდომარეობის კანდიდატზე კონსულტაციებს დღეს შეაჯამებს

პრეზიდენტი გიორგი მარგველაშვილი უზენაესი სასამართლოს თავმჯდომარეობის კანდიდატის შერჩევის მიზნით გამართულ კონსულტაციებს დღეს სამოქალაქო სექტორთან შეხვედრაზე შეაჯამებს. ამის შესახებ 1tv წერს.

პრეზიდენტის მრჩევლებმა კანდიდატის შერჩევის კრიტერიუმებთან დაკავშირებით ბოლო პერიოდის განმავლობაში შეხვედრები საერთაშორისო და ადგილობრივ არასამთავრობო ორგანიზაციებთან გამართეს. ისინი შეხვდნენ აკადემიურ წრეებსა და ადვოკატთა ასოციაციის წარმომადგენლებს.

საქართველოს პრეზიდენტის მრჩევლის, კახა კოჟორიძის ინფორმაციით, დღევანდელ შეხვედრაზე უკვე გამართული კონსულტაციები შეჯამდება, რის შემდეგაც უზენაესი სასამართლოს თავმჯდომარეობის კანდიდატი დასახელდება.

„როგორც საზოგადოებისთვის ცნობილია, ბოლო ორი კვირის განმავლობაში საქართველოს პრეზიდენტის ადმინისტრაცია აქტიურად აწარმოებდა კონსულტაციებს და შეხვედრებს იურიდიული პროფესიის სხვადასხვა ჯგუფებთან და წარმომადგენლებთან. ჩვენ ამჯერად უკვე ჩავატარებთ გაფართოებულ შეხვედრას პრეზიდენტის მონაწილეობით და მოხდება მთელი ამ შეხვედრების შეჯამება, კიდევ ერთხელ გაანალიზება და საბოლოო გადაწყვეტილების მიღება იმასთან დაკავშირებით, თუ ეს პროცესი რა გზით მიდის და ამის შემდეგ უკვე მოხდება კანდიდატების დასახელებაც“, – აღნიშნა კახა კოჟორიძემ.

16 აგვისტოს ითქვა, რომ უზენაესი სასამართლოს თავმჯდომარის კანდიდატურის შესარჩევად შესაძლოა ღია კონკურსი გამოცხადდეს.

საპარლამენტო უმრავლესობის ლიდერის, არჩილ თალაკვაძის თქმით, იმის მოლოდინი, რომ პრეზიდენტი უზენაესი სასამართლოს თავმჯდომარის პოზიციაზე დამოუკიდებელ კანდიდატურას შეარჩევს, პესიმისტურია.

პრეზიდენტის სასახლეში უზენაესი სასამართლოს თავმჯდომარეობის კანდიდატის შესარჩევად კონსულტაციები 6 აგვისტოს დაიწყო. 

უზენაესი სასამართლოსა და იუსტიციის უმაღლესი საბჭოს თავმჯდომარემ ნინო გვენეტაძემ თანამდებობის დატოვების შესახებ 2 აგვისტოს განაცხადა და ამის მიზეზად ჯანმრთელობის მდგომარეობა დაასახელა. მისი გადაწყვეტილება მოულოდნელი აღმოჩნდა, როგორც იუსტიციის უმაღლესი საბჭოს წევრებისთვის, ისე პოლიტიკოსებისთვის.

ნინო გვენეტაძე უზენაესი სასამართლოს თავმჯდომარის პოსტზე საქართველოს პარლამენტმა 2015 წლის 20 მარტს აირჩია. მან ამ პოზიციაზე კოტე კუბლაშვილი შეცვალა. უზენაესი სასამართლოს თავმჯდომარის კანდიდატად გვენეტაძე პრეზიდენტმა გიორგი მარგველაშვილმა შეარჩია და პარლამენტს წარუდგინა.