ნინო ბურჯანაძე: ოკუპაციის ძახილი გამოსავალი არ არის

ოკუპაციის ძახილი არ არის გამოსავალი და ეს კიდევ ერთხელ დადასტურდა - ამის შესახებ „დემოკრატიული მოძრაობა ერთიანი საქართველოს“ ლიდერმა ნინო ბურჯანაძემ ანგელა მერკელის საქართველოში ვიზიტის შეფასებისას განაცხადა.

„ეს არის ფორმულირება, რომელიც მე ვთქვი 10 წლის წინ, რომლის გამოც ლამის ჯვარს მაცვეს და ასე ვთქვათ, ლამის მოღალატედ გამომაცხადეს. პოლიტიკოსები ამ ტერმინით საუბრობენ და ამას რუსეთ-იაპონიის მოლაპარაკებაც აჩვენებს. ქალბატონ მერკელს არაფერი ახალი არ უთქვამს. მან თქვა სიმართლე, რასაც ჩვენ სხვადასხვა რანგის პოლიტიკოსები დიდი ხანია გვეუბნებიან, უბრალოდ, საქართველოს ხელისუფლება ატყუებს მოსახლეობას, ეს არის მატყუარა ხელისუფლება ისევე როგორც წინა ხელისუფლება იყო მატყუარა ხელისუფლება. ეს არის ხალხის შეცდომაში შეყვანა აბსოლუტურად შეგნებულად. ილუზიების შექმნა, თითქოს ხვალ და ზეგ ნატოსა და ევროკავშირის კარი გაიღება“, - განაცხადა ბურჯანაძემ.

დღეს გერმანიის კანცლერი სოფელ ოძისში ჩავიდა და საოკუპაციო ხაზთან არსებულ ვითარებას გაეცნო. მან ევროკავშირის სადამკვირებლო მისიისგან დეტალური ინფორმაცია მიიღო და ჭოგრიტით საოკუპაციო ხაზს მიღმა ტერიტორია დაათვალიერა. მანამდე მერკელი ოპოზიციის წარმომადგენლებსა და სტუდენტებს შეხვდა. სტუდენტებთან შეხვედრაზე საუბარი შეეხო ოკუპაციას. 

მერკელმა საქართველოში ვიზიტი დღეს დაასრულა. ის საქართველოს 23 აგვისტოს ეწვია. მერკელი ვიზიტის პირველ დღეს საქართველოს პრემიერსა და პრეზიდენტს შეხვდა.

დღეს კი ის ოპოზიციის წარმომადგენლებსა და სტუდენტებს შეხვდა. სტუდენტებთან შეხვედრაზე საუბარი შეეხო ოკუპაციას. 

„ეს არის ოკუპაცია და ეს არის ჩემი პასუხიც. ეს რეგიონები არის ოკუპირებული, დაკავებულია ტერიტორიის 20%, ამასთან ერთად, ეს რჩება ძალიან უხეშ დიდი უსამართლობად", - განაცხადა კანცლერმა.

საქართველოდან მერკელი სომხეთში გაემგზავრა, შემდეგ კი ის აზერბაიჯანს ეწვევა.