ეროვნულ გამოცდებზე მინიმალური ზღვარი 12 000-მა აბიტურიენტმა ვერ გადალახა

შეფასებისა და გამოცდების ეროვნული ცენტრის ინფორმაციით, 2018 ერთიანი ეროვნული გამოცდების საბოლოო შედეგები ცნობილია.  ცენტრის ხელმძღვანელის ინფორმაციით, იმ აბიტურიენტთა რაოდენობა, რომლებმაც მინიმალური კომპეტენციის ზღვარი გადალახეს, მაგრამ უნივერსიტეტში ჩასარიცხად ქულები არ ეყოთ, 482-ია. 

სტუდენტი გახდა 27906 აბიტურიენტი. ამასთან, 39 000-ზე მეტი აპლიკანტიდან მინიმალური კომპეტენციის ზღვარი ვერ გადალახა დაახლოებით 12 000-მა აბიტურიენტმა (ნაწილი გამოცდაზე არ გამოცხადდა).

მაია მიმინოშვილის თქმით, უნივერსიტეტებში 14 569 ადგილი ვაკანტური დარჩა, მათ შორის თბილისის სახელმწიფო უნივერსიტეტსა და თბილისის სახელმწიფო სამედიცინო უნივერსიტეტში. 

შედეგების გასაგებად სისტემაში შესასვლელად აპლიკანტმა უნდა მიუთითოს პირადი ნომერი და საგამოცდო საიდენტიფიკაციო ნომერი, იქვეა განთავსებული ნაშრომის სკანირებული ასლი.

გამოცდების ეროვნულმა ცენტრმა ასევე გამოაქვეყნა 2018 წლის ერთიანი ეროვნული გამოცდების გამსვლელი ქულები.

შეფასებისა და გამოცდების ეროვნულ ცენტრში გამოცდის შედეგი 2 000-ზე მეტმა აბიტურიენტმა გაასაჩივრა.

ერთიანი ეროვნული გამოცდები 2 ივლისს დაიწყო და 26 ივლისს, ფიზიკის გამოცდით დასრულდა. საქართველოში სულ 22 საგამოცდო ცენტრი ფუნქციონირებდა.