მარგველაშვილმა განმარტა, რატომ არ წარადგენს უზენაესი სასამართლოს თავმჯდომარეობის კანდიდატს

საქართველოს პრეზიდენტმა გიორგი მარგველაშვილმა ჟურნალისტებთან იმ მიზეზების შესახებ ილაპარაკა, რომლის გამოც უზენაესი სასამართლოს თავმჯდომარეობის კანდიდატურის წარდგენისგან თავი შეიკავა.

„ეს ამბის მოკლე შინაარსი მათთვის, ვისაც არ უნახავს წინა 200 სერია. ვითარება არის შემდეგი: მე შევთავაზე ქართულ იურიდიულ საზოგადოებას, გამოევლინათ საუკეთესო კანდიდატი და ვთქვი, რომ მხარს დავუჭერდი კანდიდატს. მივმართე ქართულ საზოგადოებას, მოდით, ხომ ყველას გვადარდებს სასამართლო, გავერთიანდეთ. სამწუხაროდ, ეს გაერთიანება არ მოხდა. ასეთი გაერთიანების გარეშე კანდიდატის დასახელებას აზრი არ აქვს. არ მესმის, რატომ იქნა ეს პროცესი ჩაგდებული და მეტიც, არ მესმის, რა არის აქ გაუგებარი. თუ ვერ გავერთიანდებით ყველა უკეთესი მომავლისთვის, უკეთესი გადაწყვეტილებისთვის, მაშინ ჩვენ ვერ მივიღებთ უკეთეს მომავალს. ეს უნდა იცოდეს ყველა ადამიანმა, ვინც ამ პროცესს ადევნებს თვალ-ყურს და ყველა იმ ადამიანმა, ვინც ღიად უარი მითხრა, რომ კანდიდატურის თაობაზე თავისი პოზიცია დაეფიქსირებინა. ასეთია ამ ეტაპისთვის ვითარება, კონსენსუსისთვის ნაბიჯიც არ გადაიდგა. სასამართლო სისტემა მუდმივად არის ჩემი დარდის საფუძველი და მუდმივად ამ მიმართულებით ვცდილობდი ნაბიჯების გადადგმას, მაგრამ სამწუხაროდ ეს ვერ შედგა. შეთანხმება რომ შემდგარიყო, ჩვენ გვექნებოდა ძალა, რომ ძლიერი კანდიდატი წარგვედგინა პარლამენტში და მისი კანდიდატურის ჩაგდება არ იქნებოდა ადვილი”, - თქვა გიორგი მარგველაშვილმა, რომელმაც დღესვე განაცხადა, რომ 2018 წლის საპრეზიდენტო არჩევნებში მეორე ვადით კენჭს არ იყრის.   

 დღეს  კოალიცი ამ  „დამოუკიდებელი და გამჭვირვალე მართლმსაჯულებისთვის“ საქართველოს პრეზიდენტს  მოუწოდა უზენაესი სასამართლოს თავმჯდომარის კანდიდატის დასახელებაზე უარის გადაწყვეტილება შეცვალოს. 

24 აგვისტოს გაირკვა, რომ პრეზიდენტი უზენაესი სასამართლოს თავმჯდომარის კანდიდატურას აღარ წარადგენს.

პრეზიდენტის გადაწყვეტილებას სახალხო დამცველმა სამწუხარო უწოდა. განცხადება არ გაჰკვირვებია იუსტიციის მინისტრს, თეა წულუკიანი ამბობს, რომ თავიდანვე გაურკვეველი იყო პრეზიდენტის პოზიცია. საპარლამენტო უმრავლესობის წარმომადგენელი, მამუკა მდინარაძე კი ფიქრობს, რომ პრეზიდენტი არაადეკვატური ხდება.

პრეზიდენტის სასახლეში უზენაესი სასამართლოს თავმჯდომარეობის კანდიდატის შესარჩევად კონსულტაციები 6 აგვისტოს დაიწყო. კონსულტაციებს ჯერ მმართველი გუნდი, ხოლო მოგვიანებით არასამთავრობო სექტორიც გამოეთიშა.

უზენაესი სასამართლოსა და იუსტიციის უმაღლესი საბჭოს თავმჯდომარემ ნინო გვენეტაძემ თანამდებობის დატოვების შესახებ 2 აგვისტოს განაცხადა და ამის მიზეზად ჯანმრთელობის მდგომარეობა დაასახელა.

ნინო გვენეტაძე უზენაესი სასამართლოს თავმჯდომარის პოსტზე საქართველოს პარლამენტმა 2015 წლის 20 მარტს აირჩია. მან ამ პოზიციაზე კოტე კუბლაშვილი შეცვალა. უზენაესი სასამართლოს თავმჯდომარის კანდიდატად გვენეტაძე პრეზიდენტმა გიორგი მარგველაშვილმა შეარჩია და პარლამენტს წარუდგინა.