ირაკლი კობახიძე ადასტურებს, რომ კანაფის საკითხზე ილია მეორეს შეხვდნენ

საქართველოს პარლამენტის თავმჯდომარემ, ირაკლი კობახიძემ დაადასტურა, რომ სამედიცინო მიზნით კანაფის წარმოება-ექსპორტის საკანონმდებლო ინიციატივის შესახებ, კათოლიკოს პატრიარქს ილია მეორეს და საპატრიარქოს წარმომადგენლებს შეხვდენენ. ირაკლი კობახიძის თქმით, შეხვედრა 16 სექტემბერს გაიმართა. ინფორმაციას "რადიო თავისუფლება" ავრცელებს.

ირაკლი კობახიძის განცხადებით, უმრავლესობის წარმომადგენლებს პატრიარქთან ამ თემაზე "კარგი საუბარი ჰქონდათ".

"პატრიარქი არის არა მხოლოდ ჩვენი სულიერი ლიდერი და ეკლესიის ხელმძღვანელი, არამედ ის არის ბრძენი ადამიანი და აქვს ყოველთვის სწორი პოზიცია იმ საკითხებთან დაკავშირებით, რომელიც ეხება ზოგადად ქვეყანაში მიმდინარე პროცესებს. აქედან გამომდინარე, ჩვენ აუცილებლად მოვუსმენთ როგორც საზოგადოებას, ისე ეკლესიას, პატრიარქს და ამის საფუძველზე მივიღებთ საბოლოო გადაწყვეტილებას“, - განაცხადა ირაკლი კობახიძემ.

კანაფის წარმოებისა და მოხმარების შესახებ კანონპროექტის განხილვასთან დაკავშირებით 16 სექტემბერს ირაკლი კობახიძემ თქვა, რომ პარლამენტმა საკითხის განხილვა გადადო. მისი განცხადებით, კანონპროექტი დაჩქარებული წესით არ განიხილება, თუმცა განხილვა პირველივე სასესიო კვირაში დაიწყება.16 სექტემბერს კობახიძემ ისიც თქვა, რომ ამ საკითხზე კონსულტაციებიი საპატრიარქოსთან გაიმართებოდა. თავად პატრიარქმა კანაფის წარმოებასა და მოხმარების შესახებ საკუთარი პოზიცია საკვირაო ქადაგებისას გამოხატა. 

17 სექტემბერს იურიდიულ საკითხთა კომიტეტის თავმჯდომარე ეკა ბესელია კანაფის კულტივაციასთან დაკავშირებით სამუშაო ჯგუფის შექმნის ინიციატივით გამოვიდა. მისი თქმით, ჯგუფში დეპუტატებთან ერთად, სასულიერო პირები და ექსპერტები უნდა შევიდნენ. ამ ინიციატივას სასულიერო პირებმა უპასუხეს, მათი თქმით, კონსულტაციებში ჩაერთვებიან მხოლოდ თავიანთი პირობები ექნებათ. 

შსს-ს ცნობით, მთავრობის მიერ მარიხუანასთან დაკავშირებით ინიცირებული საკანონმდებლო ცვლილებები ითვალისწინებს ქვეყანაში მარიხუანის გასაღების მკაცრ შეზღუდვას.

კანონპროექტი პარლამენტში 14 სექტემბერს დარეგისტრირდა. ახალმა ამბავმა საზოგადოებაში აზრთა სხვადასხვაობა გამოიწვია.

30 ივლისს საკონსტიტუციო სასამართლომ პარტია „გირჩის“ წევრების სარჩელი დააკმაყოფილა, რითაც კანაფის მოხმარებისთვის ადმინისტრაციული სასჯელი გააუქმა.საკონსტიტუციო სასამართლომ კანაფის მოხმარებაზე სისხლის სამართლის პასუხისმგებლობა 2017 წლის 30 ნოემბერს გააუქმა.

იმავდროულად საკონსტიტუციო სასამართლოს გადაწყვეტილების ფონზე შსს-მ კანაფის მავნე ზეგავლენის წინააღმდეგ ახალი რეგულაციები მოამზადა.

ასევე ცნობილია, რომ გარემოს დაცვისა და სოფლის მეურნეობის სამინისტროს დაქვემდებარებაში კანაფის კონტროლის სააგენტო შეიქმნება.