მმართველი გუნდი კანაფის მოყვანა-წარმოებაზე კანონპროექტის დაჩქარებულ განხილვას არ ემხრობა

რა ფორმით გააცნობს მმართველი გუნდი საზოგადოებას კანონპროექტს, რომლის მიხედვითაც საქართველო სამედიცინო მიზნით კანაფის კულტივაციას დაიწყებს ჯერ უცნობია. დიდი ალბათობით პროცესში მონაწილეობას არ მიიღებენ სასულიერო პირები და კონსერვატორები.

უმავლესობის წევრის, ეკა ბესელიას განცხადებით, 19 სექტემბრიდან პარლამენტი იწყებს კანონპროექტის იმ ნაწილის განხილვას, რომელიც კანაფის გამოყენების აკრძალვის ახალ ნორმებს შეეხება. 

"დღეს ეს სივრცე, სამართლებრივი ველი ღიად არის დარჩენილი და პოლიციელებისთვისაც უკვე პრობლემაა გარკვეულწილად რეაგირება ისეთ შემთხვევებზე, რომელიც აუცილებლად უნდა იყოს დაცული. რაც შეეხება მეორე პაკეტს, რომელიც ეხება კანაფის სამედიცინო მიზნებით წარმოების საკითხს, კარგია, რომ ამაზე მივიღეთ გადწყვეტილება და მე ვემხრობი ამ გადაწყვეტილებას, რომ მისი განხილვის პროცესი შეჩერდა. მე მგონი, ყველა ვთანხმდებით, რომ არ უნდა იყოს ნაჩქარევად მიღებული გადაწყვეტილება", - თქვა ბესელიამ.

აზრთა სხვადასხვაობის ფონზე კი შინაგან საქმეთა მინისტრი ირწმუნება, რომ მის უწყებას კანაფის კულტივაცია-ექსპორტის ეფექტური კონტროლი არ გაუჭირდება.

"რეალურად, მარიხუანას მოხმარების იმ ნაწილში, სადაც სრული ქაოსი და დაუსჯელობა გვქონდა, გავაჩინეთ საზოგადოებრივი აზრის ზემოქმედების ძალიან დიდი ინსტრუმენტი. ჩათვალეთ, რომ ეს არის გარკვეული ზეწოლა გადაწყვეტილების მიღებაზე, როდესაც ადამიანი პირველ ნაბიჯს დგამს, მოიხმაროს ეს ნივთიერება თუ არა", - თქვა გიორგი გახარიამ.

სამედიცინო მიზნით კანაფის კულტივაციისა და ექსპორტის შესახებ კანონპროქეტის განხილვა გაურკვეველი დროით გადაიდო. მმართველ გუნდს საკითხზე მსჯელობა ახლა პარალმენტს გარეთ გააქვს. იწყება კონსულტაციები სასულიერო პირებთან და ექსპერტებთან. ირაკლი კობახიძე, რომელიც ამ საკითხთან დაკავშირებით უკვე შეხვდა პატრიარქს და მას ხელისუფლების პოზიცია გააცნო, ამბობს, რომ გადაწყვეტილების მიღებისას ერთ-ერთი განმსაზღვრელი სწორედ საპატრიარქოს პოზიცია იქნება.

კანონპროექტი პარლამენტში 14 სექტემბერს დარეგისტრირდა. ახალმა ამბავმა საზოგადოებაში აზრთა სხვადასხვაობა გამოიწვია.

15 სექტემბერს, შინაგან საქმეთა მინისტრის მოადგილემ, ნათია მეზვრიშვილმა ტელეკომპანია „იმედის“ ეთერში მარიხუანის რეგულირებისა და კანაფის მოყვანა-წარმოების შესახებ კანონპროექტებთან დაკავშირებით ისაუბრა.

მისი თქმით, კანაფის შესახებ მითქმა-მოთქმა მოვისმინეთ ადამიანებისგან, რომლებსაც კანონპროექტი არც წაუკითხავთ.

15 სექტემბერს ღამით, საკრებულოსთან სასულიერო პირებმა კანაფთან დაკავშირებული პოლიტიკა გააპროტესტეს.

შსს-ს ცნობით, მთავრობის მიერ მარიხუანასთან დაკავშირებით ინიცირებული საკანონმდებლო ცვლილებები ითვალისწინებს ქვეყანაში მარიხუანის გასაღების მკაცრ შეზღუდვას.

30 ივლისს საკონსტიტუციო სასამართლომ პარტია „გირჩის“ წევრების სარჩელი დააკმაყოფილა, რითაც კანაფის მოხმარებისთვის ადმინისტრაციული სასჯელი გააუქმა.საკონსტიტუციო სასამართლომ კანაფის მოხმარებაზე სისხლის სამართლის პასუხისმგებლობა 2017 წლის 30 ნოემბერს გააუქმა.

იმავდროულად საკონსტიტუციო სასამართლოს გადაწყვეტილების ფონზე შსს-მ კანაფის მავნე ზეგავლენის წინააღმდეგ ახალი რეგულაციები მოამზადა.

ასევე ცნობილია, რომ გარემოს დაცვისა და სოფლის მეურნეობის სამინისტროს დაქვემდებარებაში კანაფის კონტროლის სააგენტო შეიქმნება.