გიორგი კახიანი: საკონსტიტუციო ცვლილებაზე ნაციონალების მოთხოვნა აბსურდულია

„ნაციონალური მოძრაობის“ ოპოზიციური ჯგუფი „ძალა ერთობაშია“ საკონსტიტუციო ცვლილებებისთვის 200 000 ხელმოწერის შეგროვებას იწყებს. შესაბამისი ბლანკები მათ საპროცედურო საკითხთა კომიტეტმა დღეს გადასცა.

"ძალა ერთობაშია" ითხოვს, რომ კონსტიტუციით აიკრძალოს ქვეყანაში კანაფის და სხვა ნარკოტიკული საშუალებების კულტივირება, წარმოება და გადამუშავება.

"კონსტიტუცია ის დოკუმენტია, რომელმაც უნდა ასახოს საზოგადოებრივი და პოლიტიკური შეთანხმება საზოგადოებისთვის მნიშვნელოვან საკითხზე. ჩვენ ვხედავთ, კანაფის და სხვა ნარკოტიკული საშუალებების კულტივაცია, ამ ბიზნესის წარმოება ერთი ადამიანის ხელში იქნება თავმოყრილი და უგულებელყოფს იმ საზოგადოებრივ დაკვეთას, რომელიც ამ საკითხთან დაკავშირებით არის. კონსტიტუცია არის ის გარანტია, რომელიც ამ გიჟური იდეიდან ხელისუფლებს ხელს ააღებინებს", - განუცხადა ჟურნალისტებს ნაციონალმა ლევან ბეჟაშვილმა.

ოპოზიციური ჯგუფის მოთხოვნა ითვალისწინებს, რომ კონსტიტუციის 37-ე მუხლს დაემატოს შემდეგი შინაარსის პუნქტი: "დაუშვებელია ნარკოტიკული საშუალების, ფსიქოტროპული ნივთიერების და პრეკურსორებოს წარმოების მიზნით კანაფის ან სხვა მცენარის კულტივირება, დათესვა-მოყვანა, გადამუშავება, შენახვა-გადაზიდვა, გადაგზავნა და გასაღება. აგრეთვე ასეთი საქმიანობოს ლიცენზირება".

ამ ინიციატივას უმრავლესობის წევრი გიორგი კახიანი პოპულიზმად აფასებს. საპროცედურო საკითხთა კომიტეტის თავმჯდომარის თქმით, ინიციატივა სამართლებრივად აბსურდული და პოლიტიკურად პოპულისტურია: 

"პოლიტიკურად ეს არის პოპულისტური ინიციატივა. როგორც ჩანს მათ არჩევნების წინ გარკვეული პოლიტიკური დივიდენდების მოპოვებას ემსახურება. სამართლებრივი თვალსაზრისით ეს არის სრული აბსურდი, რადგან ითხოვენ 200 000 ხელმოწერის შეგროვებას იმ კონსტიტუციურ ნორმაზე, რომელიც ვიდრე 200 000 ხელმოწერა შეგროვდება საერთოდ აღარ იარსებებს, გამომდინარე იქიდან, რომ ახალი პრეზიდენტის ფიცის დადების შემდეგ სრულიად ახალი კონსტიტუციური ნორმა ამოქმედდება და ის აღარ იარსებებს", - განმარტავს კომიტეტის თავმჯდომარე გიორგი კახიანი. 

პარლამენტმა კანაფის კონტროლის შესახებ კანონპროექტის განხილვა ორი თვით გადადო. ნაციონალებმა თქვეს, რომ განხილვის გადადება საპრეზიდენტო არჩევნებს უკავშირდება, რაც უმრავლესობამ უარჰყო. ნაციონალური მოძრაობის პოზიციას "გირჩის" პოლიტიკური ლიდერი ზურაბ ჯაფარიძე გამოეხმაურა. ჯაფარიძის თქმით, ნაცმოძრაობის პოზიცია ფარისევლურია, რადგან მათთან ერთად არაერთხელ მოუწევია კანაფი.

კანონპროექტი პარლამენტში 14 სექტემბერს დარეგისტრირდა. ახალმა ამბავმა საზოგადოებაში აზრთა სხვადასხვაობა გამოიწვია.

შსს-ს ცნობით, მთავრობის მიერ მარიხუანასთან დაკავშირებით ინიცირებული საკანონმდებლო ცვლილებები ითვალისწინებს ქვეყანაში მარიხუანის გასაღების მკაცრ შეზღუდვას.

30 ივლისს საკონსტიტუციო სასამართლომ პარტია „გირჩის“ წევრების სარჩელი დააკმაყოფილა, რითაც კანაფის მოხმარებისთვის ადმინისტრაციული სასჯელი გააუქმა.საკონსტიტუციო სასამართლომ კანაფის მოხმარებაზე სისხლის სამართლის პასუხისმგებლობა 2017 წლის 30 ნოემბერს გააუქმა.