დასახელდა მიზეზები, თუ რატომ არ უნდა შეიყვანოთ სკოლაში ბავშვი, რომელიც გამართულად ვერ ლაპარაკობს

გამოცემა edu.aris.ge დაინტერესდა თუ, რა მიზეზები არსებობს იმისთვის, რომ არ შეიყვანოთ სკოლაში ბავშვი, რომელიც გამართულად ვერ ლაპარაკობს. 

ამავე ინფორმაციის მიხედვით, ბავშვს შესაძლოა, სიტყვებისა და წინადადებების არამარტო წარმოთქმის, არამედ გაგების დონეზეც აქვს პრობლემები. ამას რეცეპტული ენის დარღვევას ეძახიან და შეუიარაღებელი თვალით რთული შესამჩნევია სასკოლო ასაკის ბავშვებში. ამ შემთხვევაში, მოსწავლეს გაუჭირდება იმ ენობრივად გაშუალებულ გამოწვევებთან გამკლავება, რაც ასაკობრივად მოეთხოვება .მაგალითად: პედაგოგის მიერ გაცემული რამდენიმე საფეხურიანი მითითებების გაგება, გრძელი და რთული ქვეწყობილ-თანწყობილი წინადადებებიდან შინაარსის გამოტანა, თანატოლის ლაპარაკის გაგება და ადეკვატური პასუხის დაბრუნება, ასევე მონათხრობი ამბის გააზრება.

მას შესაძლოა არ აქვს ასაკის შესაბამისი სიტყვათა მარაგი. აქ იგულისხმება არსებითი სახელების, ზედსართავი სახელების, ზმნების, კავშირებისა და წინადადებების სხვა წევრების საცავი, რაც სჭირდება 6 წლის ბავშვს.

ეს იმას ნიშნავს რომ, მოსწავლე ვერ იგებს წიგნში მოცემულ ტერმინოლოგიას, უჭირს კითხვებზე პასუხის გაცემა. საუბრისას აკეთებს ხანგრძლივ პაუზებს და იყენებს ე.წ. სარეველა სიტყვებს. უფრო რთულ შემთხვევებში, როდესაც ბავშვმა არ იცის ამა თუ იმ საგნის დასახელება მას ანაცვლებს შინაარსობრივად მსგავსი სიტყვებით. მაგალითად, სიტყვა „დანის“ ნაცვლად ამბობს ჩანგალს.

ასევე შესაძლოა, ასაკის შესაბამისად არ აქვს განვითარებული ენობრივად გაშუალებული სმენითი აღქმა. ეს იმას ნიშნავს რომ, მოსწავლე ვერ მოახერხებს სიტყვის ბგერებად დაშლას და პირიქით ბგერების სიტყვაში გაერთიანებას. იგი ვერ გაარჩევს ერთმანეთისგან ჟღერადობით მსგავს ბგერებსა და სიტყვებს. ეს ყველაფერი კი კრიტიკულად შეუშლის ხელს ბავშვს როგორც სიტყვის ამოკითხვის დროს, ასევე კარნახით ჩაწერის დროს.

"თუ 6 წლის ბავშვს აქვს გრამატიკულად გაუმართავი წინადადებები ან ამბის თხრობის სირთულე, ეს ავტომატურად აისახება წერისა და კითხვის პრობლემაში. ბავშვი წერისას აწყობს წინადადებას ზუსტად ისე, როგორც საუბრისას. ნაწერი გაუმართავია. წინადადებების წევრები ერთმანეთთან არასწორადაა დაკავშირებული, ან მცდარია წინადადებაში წევრების თანმიმდევრობა. შედეგად, შინაარსის გამოტანა რთულია. ხოლო ამბის თხრობის სირთულის დროს, როცა ბავშვს უჭირს მოვლენების თანმიმდევრულად გადმოცემა ანალოგიურ შეცდომას უშვებს ე.წ. „თავისუფალი თემის“ ან ტექსტის შინაარსის წერის დროს,"- წერს გამოცემა.

ამავე ინფორმაციით, ენობრივი დეფიციტის გამო მეორადად წარმოქნილი წერა-კითხვის სირთულეები უარყოფით ზეგავლენას ახდენს ბავშვის თვითშეფასებაზე და ზოგადად სწავლის მოტივაციაზე. მეტყველების ზოგიერთი პრობლემა –როგორიცაა „ბგერის დარღვევა“ უარყოფითად აღიქმება ხოლმე უშუალოდ თანატოლების მხრიდან. თუ ბავშვი ამახინჯებს სიტყვებს ბგერების სწორად წარმოთქმის პრობლემის ხარჯზე, იგი შესაძლოა გახდეს კლასში ჩაგვრის ობიექტი და გაუჭირდეს თანაკლასელებთან დამეგობრება.