ბახტაძე: აშშ-სა და საქართველოს ურთიერთობა ასეთ მაღალ დონეზე არასდროს ყოფილა

საქართველოს პრემიერმინისტრმა მამუკა ბახტაძემ „ქრონიკასთან“ საუბრისას აშშ-ში თავისი სამუშაო ვიზიტი შეაჯამა. მისი თქმით, დასავლეთისგან საქართველოს ასეთი მხარდაჭერა „მანამდე არასდროს ჰქონია“. 

„ჩვენ დღეს ვართ იმ ეტაპზე რომ ჩვენი ურთიერთობები მაღალ საფეხურზე ავიყვანოთ, განსაკუთრებით ეს ეხება უსაფრთხოებას და ეკონომიკურ თანამშრომლობას“, - განაცხადა პრემიერმინისტრმა.

„საქართველო არის მართლაც კარგი მაგალითი იმისა, თუ როგორ ხდება კონსესუსი მიღწევა შტატებთან. ჩვენ გვაქვს სრული მხარდაჭერა მათ შორის იმ პოლიტიკაში რომელსაც ჩვენ ვახორციელებთ რუსეთის ფედერაციასთან მიმართებაში“.

პრემიერმინისტრის თქმით, ბოლო ორი წლის განმავლობაში ხუთი საკანონმდებლო აქტის მიღება მოხდა, სადაც ერთმნიშვნელოვნად მხარდაჭერილია საქართველოს ტერიტორიული მთლიანობა, ნახსენებია ის აგრესია და ოკუპაცია, რომელსაც რუსეთის ფედერაცია საქართველოში ახორციელებს.

„შესაძლო თავისუფალი სავაჭრო რეჟიმი არ იქნება მხოლოდ ეკონომიკურ თანამშრომლბაზე ხაზის გასმა, ეს იქნება პოლიტიკური ნაბიჯიც. ჩვენი სტრატეგიაა, რომ საქართველო გახდეს ეკონომიკური ცენტრი მთელი რეგიონისთვის და ჩვენს ამერიკელ მეგობრებსაც ასეთი ხედვა აქვს“, - ამბობს მამუკა ბახტაძე.

პრემიერმა ეკონომიკურ პროგრამებზეც ილაპარაკა. „მსოფლიო ბანკი ახორციელებს ადამიანური კაპიტალის განვითარების პროგრამას და საქართველო არის ერთ-ერთი პირველი, რომელიც გახდება ამის ბენეფიციარი. ჩვენ განვაცხადეთ, რომ სწორედ განათლების სექტორი უნდა გახდეს ჩვენს ეკონომიკაში დომინანტი სექტორი და მშპ-ში 10%-უნდა აღემატებოდეს ჩვენ სავალატო ფონდთან ამასთან დაკავშირებით გვქონდა მოლაპარაკება“, - აღნიშნა ბახტაძემ.

პრემიერი აშშ-ში სამუშაო ვიზიტით 16 სექტემბრიდან იმყოფება. 20 სექტემბერს პრემიერმინისტრი აშშ-ის სახელმწიფო მდივანს მაიკ პომპეოს შეხვდა, ხოლო 21 სექტემბერს საერთაშორისო სავალუტო ფონდის დირექტორს კრისტინ ლაგარდს.