კობახიძე ევროპელებს ქვეყნის უმაღლეს პრიორიტეტებზე ესაუბრა

პარლამენტის თავმჯდომარემ, ირაკლი კობახიძემ ევროპის საბჭოს საპარლამენტო ასამბლეის კულტურის, მეცნიერების, განათლებისა და მედიის კომიტეტის სხდომა მისასალმებელი სიტყვით გახსნა. ინფორმაციას 1tv ავრცელებს.

ირაკლი კობახიძის განცხადებით, ქვეყნისთვის უმაღლესი პრიორიტეტი არის განათლების, კულტურის, მედიის და მეცნიერების პოპულარიზაცია. პარლამენტის თავმჯდომარის თქმით, ქვეყნები ერთმანეთს უნდა ეჯიბრებოდნენ არა ძალით, არამედ უკეთესი საგანმანათლებლო სისტემითა და თუ კულტურით. ამ შემთხვევაში, სამყარო იქნება ბევრად განვითარებული.

"იმის მიუხედავად, რომ საქართველო არის ოკუპირებული რუსეთის მიერ, ჩვენი ქვეყანა პროგრესულად ვითარდება და დემოკრატიული ღირებულებების წინა რიგებში ვდგავართ. ვეფუძნებით ყველა იმ ღირებულებას, რომელზეც ევროკომისიაა დაფუძნებული – ეს არის ჩვენი კულტურის ნაწილი და რა თქმა უნდა, ძალისხმევას არ დავიშურებთ, რომ არა მხოლოდ საქართველოში, არამედ ჩვენს რეგიონში ეს ღირებულებები იყოს დაფასებული. მინდა, კიდევ ერთხელ მოგიწოდოთ, რომ გაეცნოთ ჩვენს ისტორიულ კულტურას აქ ყოფნის დროს“, – მიმართა ირაკლი კობახიძემ კომიტეტის სხდომაში მონაწილეებს.

საქართველოს მთავრობამ იყალთოს სამონასტრო კომპლექსში განათლების რეფორმის ხედვა წარადგინა. განათლების სფეროს რეფორმირების შესახებ საქართველოს პრემიერმინისტრმა მამუკა ბახტაძემ და განათლების მინისტრმა მიხეილ ბატიაშვილმა ისაუბრეს.

პარლამენტი ევროპის საბჭოს საპარლამენტო ასამბლეის კულტურის, მეცნიერების განათლების და მედიის კომიტეტის სხდომას მასპინძლობს. ეს არის პირველი შემთხვევა, როდესაც ამ კომიტეტის სხდომა საქართველში ტარდება და ევროპის 15-ზე მეტი ქვეყნის პარლამენტის წევრი მონაწილეობს. კომიტეტი განიხილავს ისეთ საკითხებს, როგორიცაა განათლების სისტემის თანამედროვე ტექნოლოგიურ მოთხოვნებთან შესაბამისობაში მოყვანა, ევროპის კულტურული მემკვიდრეობის დაცვა, ასევე თანამდროვე მედიის წინაშე მდგარი გამოწვევები, მათ შორის დეზინფორმაციის და პროპაგანდის მზარდი საფრთხეები დემოკრატიული ქვეყნებისთვის.