როგორ ხდება გამარტივებული წესით საქართველოს მოქალაქეობის მინიჭება

„მოქალაქეობის შესახებ“ კანონში ცვლილებების თანახმად,  საქართველოს ყოფილ მოქალაქეებს საშუალება აქვთ, საქართველოს მოქალაქეობის აღდგენის მოთხოვნით სერვისების განვითარების სააგენტოს მიმართონ.

ცვლილებები კანონში აგვისტოში  ამოქმედდა.

გარდა ამისა, იუსტიციის სამინისტროს ინფორმაციით, არსებობს საქართველოს მოქალაქოების მინიჭების გამარტივებული წესი, რომლითაც გარკვეული კატეგორიის პირები სარგებლობენ.

როგორც სამინისტროს ვებგვერდზეა განმარტებული, საქართველოს მოქალაქეობას გამარტივებული წესით მოიპოვებენ ის პირები, რომლებიც დაქორწინებულია საქართველოს მოქალაქეზე და კანონიერ საფუძველზე უწყვეტად ცხოვრობს საქართველოში მოქალაქეობის მინიჭების შესახებ განცხადების წარდგენის დღემდე ბოლო 5 წლის განმავლობაში. 

დაინტერესებული პირი საქართველოში უწყვეტად მცხოვრებად ჩაითვლება, თუ მას წლის განმავლობაში ჯამში 90 დღეზე მეტი ვადით საქართველოს ტერიტორია არ დაუტოვებია . ამ ვადაში არ ითვლება საქართველოს ტერიტორიის 2 წლამდე ვადით დატოვება სწავლის მიზნით და მკურნალობის მიზნით საქართველოს ტერიტორიის დატოვება.

დაინტერესებული პირი განცხადებას გამარტივებული წესით საქართველოს მოქალაქეობის მინიჭების თაობაზე იუსტიციის სახლის ან სერვისების განვითარების სააგენტოს ნებისმიერ ტერიტორიულ სამსახურში; საზღვარგარეთ , საკონსულო დაწესებულებაში ან დიპლომატიურ წარმომადგენლობაში წარადგენს.

საქართველოს მოქალაქეობის გამარტივებული წესით მინიჭებაზე განცხადება უნდა წარადგინოს სრულწლოვანმა პირადად, არასრულწლოვანის კანონიერმა წარმომადგენელმა, დაინტერესებული პირის ნოტარიუსით დამოწმებულმა მინდობილმა პირმა.

გასათვალისწინებელია, რომ არასრულწლოვანის ან მხარდამჭერის მიმღები პირის მოქალაქეობის მინიჭება დასაშვებია მათი მშობლების (ორივე) ან სხვა კანონიერი წარმომადგენლის თანხმობით. 14 წელს მიღწეული არასრულწლოვანი პირის მოქალაქეობის მინიჭება დასაშვებია მისი თანხმობით. 

იუსტიციის სამინისტროს განმარტებით, უცხო ქვეყნის მოქალაქეს უფლება აქვს მიმართოს უფლებამოსილ ორგანოს საქართველოს მოქალაქეობის გამარტივებული წესით მინიჭების მოთხოვნით, თუ ის აკმაყოფილებს მოქალაქეობის გამარტივებული წესით მინიჭების კანონით დადგენილ პირობებს. სხვა ქვეყნის მოქალაქისათვის საქართველოს მოქალაქეობის მინიჭების შესახებ საქართველოს პრეზიდენტის ბრძანებულება მოქმედებს საქართველოს კომპეტენტური ორგანოების მიერ ამ პირის სხვა ქვეყნის მოქალაქეობიდან გასვლის დამადასტურებელი დოკუმენტის მიღებისთანავე.

საქართველოს მოქალაქეობის გამარტივებული წესით მინიჭების მომსახერების საფასური მე-80 კალენდარულ დღეს მომზადებისთვის 50 ლარია; 60 დღეში 100 ლარი; 40 დღეში 200 ლარი; 20 დღეში კი 300 ლარი.