ჩუგოშვილი ევროსაბჭოში რუსეთის დარჩენის მნიშვნელობას განმარტავს

პარლამენტის თავმჯდომარის მოადგილის თამარ ჩუგოშვილის განცხადებით, რუსეთი ევროსაბჭოში უნდა დარჩეს, რათა მის წინააღმდეგ შესაძლებელი იყოს სტრასბურგის სასამართლოს, როგორც მექანიზმის გამოყენება. ამის შესახებ მან ჩუგოშვილმა სტრასბურგში განაცხადა. მის კომენტარს 1tv ავრცელებს.

"არავის უნდა, რომ რუსეთი გავიდეს ევროსაბჭოდან, რადგან თუ ეს ასე მოხდება, მასზე აღარ გავრცელდება სტრასბურგის სასამართლოს მოთხოვნები. ჩვენ გვინდა, რომ რუსეთი დარჩეს ევროსაბჭოში, რათა სტრასბურგის სასამართლოს, როგორც მექანიზმის გამოყენება შეგვეძლოს რუსეთის წინააღმდეგ. ბუნებრივია, რომ საკმაოდ დიდია ინტერესი, რომ რუსეთი იყოს საბჭოს წევრი და მათ შორის სტრასბურგის სასამართლოს გადაწყვეტილებები რუსეთზე ვრცელდებოდეს, მაგრამ რუსეთმა უნდა შეასრულოს თავისი ვალდებულებები და მათ შორის, უნდა გადაიხადოს საწევროც", - განაცხადა ჩუგოშვილმა. 

სტრასბურგში ქართული დელეგაციის ხელმძღვანელის თქმით, ევროსაბჭომ გუშინდელი გადაწყვეტილებით ხაზი გაუსვა იმ ფაქტს, რომ რუსეთი ევროსაბჭოში მიღებული სხვადასხვა რეზოლუციებით მასზე დაკისრებულ ვალდებულებებს უნდა ასრულებდეს.

"მათი მუქარა, რომ დატოვებენ ევროსაბჭოს, არარეალურია. ვფიქრობ, რომ რუსეთს სჭირდება აღიდგინოს ის ზიანი, რაც წლების განმავლობაში მის რეპუტაციას მიადგა. მთავარია, რომ ევროპის ქვეყნები იყვნენ პრინციპულები, როდესაც საქმე რუსეთს ეხება. გუშინ, მათ დაიკავეს ეს პრინციპული პოზიცია და ამიტომ, მათი გუშინდელი გადაწყვეტილება იყო ძალიან მნიშვნელოვანი", - აღნიშნა საპარლამენტო დელეგაციის ხელმძღვანელმა.

ევროსაბჭოს გენერალური მდივნის ტორბიორნ იაგლანდის განცხადებით, თუ რუსეთი ორგანიზაციის საწევრო გადასახადს არ გადაიხდის, მოსკოვის წინააღმდეგ სანქციებს მიიღებენ და ის შესაძლოა, ევროსაბჭოდან გარიცხონ კიდეც.

12 ოქტომბერს სტრასბურგში დაგეგმილია ევროსაბჭოს მინისტრთა კომიტეტის საგანგებო სხდომა, რომელზეც რუსეთის საკითხის განხილვა იგეგმება.

რუსეთი ევროსაბჭოს საპარლამენტო ასამბლეის გადაწყვეტილებამ გააღიზიანა. კერძოდ, რუსეთის უკმაყოფილება გამოიწვია იმ ფაქტმა, რომ 9 ოქტომბერს, ევროსაბჭოს საპარლამენტო ასამბლეამ მხარი არ დაუჭირა რეგლამენტში შესატან ცვლილებას, რომელიც რუსეთს მისცემდა სესიებში მონაწილეობის უფლების აღდგენის შესაძლებლობას.

ყირიმის ანექსიის გამო რუსეთს 2014 წლის აპრილში ჩამოერთვა ევროსაბჭოს საპარლამენტო ასამბლეაში ხმის მიცემის და მმართველ სტრუქტურებში მუშაობის უფლება. 2017 წლის ივნისში რუსეთმა განაცხადა, რომ უფლებების აღდგენამდე არ გადაიხდის ევროსაბჭოს საწევროს. ორგანიზაციის ბიუჯეტში მოსკოვს ყოველწლიურად შეჰქონდა დაახლოებით 33 მილიონი ევრო, რაც მთლიანი ბიუჯეტის თითქმის 10%-ია.