ანა მარგველაშვილი: ჩვენს ქვეყანაში განსხვავებული აზრის მქონე ადამიანების ახლობლები იდევნებიან

პრეზიდენტის შვილი ანა მარგველაშვილი ტელეკომპანია "რუსთავი 2"-ის ეთერში აცხადებს, რომ მის სიძეს და მეგობრებს, პრეზიდენტის ოჯახზე ზეწოლის გამო, ავიწროებენ. ამას უკავშირებს მეგობრის, მიხეილ თათარიშვილის დაკავებასაც.

ანა მარგველაშვილი იმ ვიდეოს გამოქვეყნების მიზეზებზე საუბრობს, რომელიც მან რამდენიმე დღის წინ facebook-ში გაავრცელა.

"მიხეილ თათარიშვილს, ჩემს სიძეს, სხვა მეგობარსაც დიდი ხნის განმავლობაში აფრთხილებდნენ, რომ უპირებდნენ დაჭერას და წამლის ჩადებას. ბოლო თვეების განმავლობაში ხშირად ხდებოდა, რომ გვითვალთვალებდნენ. თვალთვალის ობიექტი იყო როგორც მიხეილ თათარიშვილი, ისე ჩემი მეგობარი თორნიკე კაჭარავა, რომელზეც ძალიან ვნერვიულობ, რომ მსგავსი ან უარესი შეიძლება გაუკეთონ და მინდია გოგოჭური, ჩემი სიძე, რომელიც, ასევე, მათი ინტერესის სფეროა. ამ ხნის განმავლობაში ქვეყნის დატოვებასაც კი სთხოვდნენ. ეუბნებოდნენ, დატოვე ქვეყანა, თორემ ნარკოტიკს ჩაგიდებთ და დაგიჭერთო", - ამბობს ანა მარგველაშვილი.

ჟურნალისტის კითხვაზე, მუქარა მოდიოდა თუ არა სამართალდამცველებისგან, მარგველაშვილმა თქვა, რომ ვერ უპასუხებს, რადგან ზუსტად არ იცის, თუმცა, ვარაუდობს, რომ მუქარა სწორედ სამართალდამცველებისგან მოდიოდა.

"განსხვავებული აზრის მქონე ადამიანების ნათესავები, შვილები ახლობლები იდევნებიან ჩვენს ქვეყანაში. მე ვერავის ხელს ვერ დავადებ, მაგრამ ფაქტია, რომ ასე ხდება. მიშოს საქმის იდენტური არაერთი საქმე არსებობს", - ამბობს პრეზიდენტის შვილი.

კონკრეტულად თათარიშვილის საქმესთან დაკავშირებით მარგველაშვილი ამბობს, რომ საქმის მოწმეები შეშინებულები არიან და ამიტომ, ალბათ, ვერ იტყვიან სიმართლეს. თუმცა, მან არ იცის, რა ჩვენებები მისცეს საგამოძიებო უწყებას მოწმეებმა. ის ყვება, რომ სურამში, სასადილოში თათარიშვილს პოლიციელებმა დანა დაადეს, ჩასვეს მანქანაში და პირდაპირ თბილისში წაიყვანეს და არა სურამის პოლიციაში, როგორც ეს საქმეშია. მარგველაშვილის თქმით, თათარიშვილს, ასევე, არ უთხრეს, რისთვის დააკავეს. ადგილზე არ ამოუღიათ არც სუბოტექსი. თბილისში ჩაყვანისას კი თათარიშვილი გააშიშვლეს და შემდეგ სველი მაისური ჩააცვეს. 

პრეზიდენტის შვილი ამბობს, რომ მისი სიძის, მინდია გოგოჭურის სახლის წინ სუს-ის მანქანა იდგა. ის იხსენებს, რომ, როდესაც გიორგი მარგველაშვილმა გააკეთა განცხადება საკუთარ ოჯახსა და ახლობლებზე ზეწოლის შესახებ, გოგოჭური, თათარიშვილი და კაჭარავა დაკითხეს, თუმცა, საქმე დღემდე გამოუძიებელია. 

ანა მარგველაშვილი აცხადებს, რომ ის ხვალისთვის დაგეგმილ აქციაზე - "არა ჩადებას" - წასვლას აპირებს. "აქამდეც მესმოდა ასეთი ფაქტების შესახებ და ჩემი დანაშაულია, რომ რეაგირებას არ ვახდენდი", - ამბობს მარგველაშვილი.

პრეზიდენტის შვილის, ანა მარგველაშვილის და სიძის, მინდია გოგოჭურის მეგობარი მიხეილ თათარიშვილი 17 მარტს დააკავეს. მას 18 აბი "სუბუტექსის" შეძენა-შენახვას ედავებიან. 18 მარტს პრეზიდენტის შვილმა facebook-ში გამოაქვეყნა ვიდეო, სადაც გოგოჭურმა და თათარიშვილმა ერთმანეთი გადაიღეს იმის დასტურად, რომ მათ ჯიბეებში არაფერი უდევთ. ანა მარგველაშვილმა განაცხადა, რომ თათარიშვილს სუბოტექსი ჩაუდეს. 20 მარტს ამ განცხადებას შს მინისტრი და მთავარი პროკურორი გამოეხმაურნენ და თქვეს, რომ პოლიციელების მიმართ მსგავს პრეტენზიებს მტკიცებულებები სჭირდება.

პრეზიდენტის სიძე მინდია გოგოჭური ბოლო 3 თვეში რამდენჯერმე მოხვდა საზოგადოების ყურადღების ცენტრში. ის 12 იანვარს თბილისში, ბალანჩივაძის ქუჩაზე დაპირისპირების დროს დაჭრეს. როგორც მაშინ გავრცელდა, გოგოჭურთან ერთად დაჭრეს მისი მეგობარიც. ერთ თვეში, 16 თებერვალს, თბილისში, შატბერაშვილის ქუჩაზე 22 წლის ბიჭი დაჭრეს. მაშინ გავრცელდა ინფორმაცია, რომ სისხლიანი გარჩევა შესაძლოა ბალანჩივაძის ქუჩის ამბის გაგრძელება ყოფილიყო.