ომბუდსმენი ხელისუფლების მხრიდან არასამთავრობოების კრიტიკას ეხმიანება

საქართველოს სახალხო დამცველი ნინო ლომჯარია  ხელისუფლების მხრიდან არასამთავრობო ორგანიზაციების კრიტიკას ეხმიანება. განცხადება ომბუდსმენის ოფიციალურ ვებგვერდზე გამოქვეყნდა.

"ბოლო პერიოდში ხელისუფლების მაღალი თანამდებობის პირების მხრიდან გაკეთდა არაერთი განცხადება, რომელიც მიზნად ისახავდა საქართველოს დემოკრატიული განვითარებისთვის უმნიშვნელოვანესი საკითხების, კორუფციის პრევენციის, ადამიანის უფლებების დაცვის, სახელმწიფო ინსტიტუტების საქმიანობის და არჩევნების მონიტორინგის მიმართულებით მომუშავე არასამთავრობო ორგანიზაციებისა და მათი ხელმძღვანელი პირების დისკრედიტაციას.

საქართველოს სახალხო დამცველს სურს შეახსენოს ხელისუფლებას ის საერთაშორისო ვალდებულებები, რასაც გაერო (https://goo.gl/accGw9), ეუთო (https://goo.gl/cw5Za9), ევროპის საბჭო (https://goo.gl/pmpPxP) და სხვა საერთაშორისო ორგანიზაციები სახელმწიფოებს უწესებენ ადამიანის უფლებების დამცველების საქმიანობის ხელშესაწყობად,"- წერია განცხადებაში.

ასევე საქართველოს სახალხო დამცველი მხარდაჭერას უცხადებს ყველა იმ ორგანიზაციას და მათ წარმომადგენელს, რომლებიც მრავალი წელია საქართველოში მუშაობენ ადამიანის უფლებების დაცვის მაღალი სტანდარტის დასამკვიდრებლად და მოუწოდებს ხელისუფლებას, იხელმძღვანელოს საერთაშორისოდ აღიარებული დემოკრატიული სტანდარტებით.

აღსანიშნავია, რომ სახალხო დამცველი 23-25 ოქტომბერს საბერძნეთის დედაქალაქ ათენში მონაწილეობას იღებს საერთაშორისო კონფერენციაში, რომლის თემატიკაც პირდაპირ ეხმიანება არასამთავრობო სექტორსა და ხელისუფლებას შორის ურთიერთობებს. სახალხო დამცველის კონფერენციაზე სიტყვით გამოსვლაში ყურადღებას საქართველოში არასამთავრობო სექტორის საქმიანობის გამოწვევებზე გაამახვილებს და კოლეგებთან ერთად განიხილავს ომბუდსმენის ინსტიტუტების როლს მათი მხარდაჭერის და გაძლიერების თვალსაზრისით.

ტელეკომპანიების „იმედის“, „პირველის“ და „რუსთავი 2“-ის წამყვანებთან ინტერვიუში ბიძინა ივანიშვილმა თქვა, რომ „საერთაშორისო გამჭვირვალობა - საქართველოს“ ხელმძღვანელი ეკა გიგაური ნაციონალური მოძრაობის აქტივისტია.

მესამე სექტორის წარმომადგენლები ხელისუფლების მხრიდან კრიტიკის ობიექტი არაერთხელ გახდნენ. ბოლოს არასამთავრობო ორგანიზაციები პარლამენტის თავმჯდომარემ ირაკლი კობახიძემ გააკრიტიკა. 

„საერთაშორისო გამჭვირვალობა - საქართველოს“ ხელმძღვანელი ეკა გიგაური იუსტიციის მინისტრმა ბოლოს დანიაში გამართულ ანტიკორუფციულ კონფერენციაზე გააკრიტიკა და მას მიკერძოებულობაში დასდო ბრალი, რასაც გიგაურის და მისი კოლეგების მხრიდან საპასუხო ბრალდებები მოჰყვა.