მმართველი გუნდი მოკლე და გრძელვადიან ცვლილებებზე შეთანხმდა

"ქართულ ოცნებაში" წინასაარჩევნო მოკლევადიან და არჩევნების შემდგომ გრძელვადიან სტრატეგიაზე შეთანხმდნენ.

ბიძინა ივანიშვილთან და სალომე ზურაბიშვილთან გამართული კონსულტაციების შემდეგ დეპუტატმა ეკა ბესელიამ თქვა, რომ ხელისუფლებამ უნდა დაარწმუნოს მოსახლეობა, საპრეზიდენტო არჩევნების მეორე ტურზე ხმის მისაცემად მივიდეს.

როგორც ბესელიამ განმარტა, მმართველმა გუნდმა პირველი ტურის შედეგებით, მოსახლეობისგან გზავნილი მიიღო და პრობლემების მოგვარებას დაიწყებს.

„რა გზავნილიც მივიღეთ, ამას კარგად ვაცნობიერებთ. არის საჭირო მნიშვნელოვანი ცვლილებები, ისეთი, რომელიც სჭირდება ჩვენ ხალხს. პირველი ეტაპი არის მოკლევადიანი, რომელიც ეხება ამ მოკლე ვადაში, საარჩევნო კამპანიის მეორე ტურამდე დასაგეგმ ღონისძიებებს, რაც აუცილებლად გასაკეთებელია, შესაცვლელია. ჩვენი შიდა საქმეა, როგორ დავალაგებთ შიდა მენეჯმენტს. იქნება ცვლილებები ამ მხრივ, იმისთვის, რომ მეორე ტურზე ყველა ამომრჩეველი მოვიდეს და გავაცნობიეროთ, რომ რეალური საფრთხეა ქვეყანაში. თუ მოვიდა რევანშისტული ძალა და ეს სახიფათოა არა "ქართული ოცნებისთვის", არამედ ქვეყნისთვის და თითოეული მოქალაქისთვის. უნდა ვიცოდეთ, რა გვინდა, მშვიდობა ქვეყანაში თუ წარსულში დაბრუნება. მეორე საკითხი ეხება არჩევნების შემდეგ განსახორციელებელ ძალიან მნიშვნელოვან და კომპლექსურ ცვლილებებს. ახლა დროა კონსოლიდირების, ჩვენი შესაძლებლობების მობილიზების.

ბესელიას თქმით, ყველამ უნდა გააცნობიეროს საფრთხე და არჩევნებზე მივიდეს.

„საკითხი არ დგას ისე, რომ დარჩება თუ არა "ოცნება" ხელისუფლებაში. ეს არჩევნები იმიტომაც არის სახიფათო, რომ ძალა რომელიც რევანშისთვის ემზადება, ეს ძალა ემზადება უმძიმესი დანაშაულისთვის მსჯავრდებული პირების გათავისუფლებისთვის. თუ ბატონ ვაშაძეს ჰგონია, რომ შეწყალების უფლება ისეთი უფლებაა, რომ ვისაც რა უნდა ქვეყანაში დააშავოს და მერე ეს ადამიანები მან შეიწყალოს, ის ცდება. ხელისუფლება გააკეთებს ყველაფერს, რომ მეორე ტური მშვიდად და დემოკრატიულად ჩავატაროთ", - განაცხადა ეკა ბესელიამ.

"არჩევნების შედეგებმა დაგვანახა, რომ ბევრი რამე ისე არ არის, როგორც უნდა იყო", - ეს განცხადება კი დეპუტატმა მირიან წიკლაურმა გააკეთა.

"არის გარკვეული რეზერვი, რომლის გამოყენებაც შეიძლება, რომ აღნიშნული პრობლემები მეტნაკლებად გადავჭრათ ან შევარბილოთ და სწორედ ამ მიმართულებით წარიმართება სტრატეგია. გუნდს უნდა ემუშავა ერთობლივად, ყველაფერი გაეკეთებინა, რომ აღნიშნული პრობლემები მოეგვარებინა. შესაბამისი ჩართულობა არ იყო და ზოგიერთი შეიძლება ვერც აკეთებდა საქმეს, როგორც უნდა გაეკეთებინა", - განაცხადა მირიან წიკლაურმა.

თუმცა წიკლაურის თქმით, ეს პრობლემა კანდიდატიდან არ გამომდინარეობდა. მისივე განმარტებით, სალომე ზურაბიშვილი ერთ-ერთი საუკეთესო კანდიდატურაა და მის მიმართ შენიშვნები დღევანდელ შეხვედრაზე არ გამოთქმულა.

„ბატონი ბიძინას ავტორიტეტი განუზომელია და ალბათ, ერთ ერთი ცენტრალური ფიგურა იქნება ამ არჩევნებში. ფორმალურად რა თანამდებობას დაიკავებს, არ ვიცი. დღეს კრიტიკული და იმედიანი პოზიცია ჰქონდა. კრიტიკა იყო მთლიანად გუნდის მუშაობის მიამრთ. მათ შორის, მან აღნიშნა ასეთი რამ, როგორც ხელმძღვანელი, მე ვიღებ ამ კრიტიკას საკუთარ თავზეც", - განაცხადა მირიან წიკლაურმა.