ლევან ბერძენიშვილმა მიხეილ სააკაშვილს აპატია

საქართველოს ყოფილ პრეზიდენტს, მიხეილ სააკაშვილს „რესპუბლიკური პარტიის“ ერთ-ერთმა დამფუძნებელმა, ლევან ბერძენიშვილმა რუსეთის სპეცსამსახურებთან თანამშრომლობაში დადანაშაულება აპატია. ამის შესახებ "რადიო თავისუფლება" წერს.

„მიხეილ სააკაშვილი პირადად მოვიდა ჩემთან და მითხრა, რომ არ მიაჩნია თავისი ის საქციელი სწორად. საერთოდ, ბოდიშს ვინც მოიხდის, იმას უნდა აპატიო. ვფიქრობ, არ არის იოლი საქართველოს პრეზიდენტი, ყოფილი ხარ, თუ სხვანაირი, სპეციალურად მიხვიდე კაცთან და მოუბოდიშო. არ არის იოლი და ვთვლი, რომ ეს ძალიან სერიოზული ნაბიჯი იყო მისი მხრიდან“, - განაცხადა ლევან ბერძენიშვილმა.

2007 წლის ამ „ინციდენტთან“ კავშირი უარყო გრიგოლ ვაშაძემ.

„ჯერ ერთი, 2007 წელს მე ვიყავი რიგითი მოქალაქე, ამიტომ ვერანაირ მონაწილეობას ამ ინციდენტში ვერ მივიღებდი. მეორე - მე პარტიის წევრი არ ვყოფილვარ 2017 წლის 21 იანვრამდე. მესამე - არასოდეს არ ვთვლიდი ლევან ბერძენიშვილს არავის ჯაშუშად და ვთვლიდი ადამიანად, რომელსაც უზარმაზარი წვლილი აქვს შეტანილი ეროვნულ მოძრაობაში და რომლის უშუალო მონაწილეობით მივაღწიეთ დამოუკიდებლობის აღდგენას“, - უთხრა ჟურნალისტებს გრიგოლ ვაშაძემ.

მისივე თქმით, „სამწუხარო ინციდენტი ამოწურულია“ და დღეს არის მხარდაჭერის, გაერთიანების დრო.

2007 წლის 7 ნოემბრის მოვლენების შემდეგ, მიხეილ სააკაშვილის ხელისუფლების წარმომადგენლები მედიაში გავრცელებულ აუდიოჩანაწერებზე დაყრდნობით ამტკიცებდნენ, რომ რესპუბლიკური პარტიის ერთ-ერთი ლიდერი ლევან ბერძენიშვილი რუსეთის ოფიციალურ წარმომადგენლებთან თანამშრომლობდა.

დღეს "რესპუბლიკელებმა" გრიგოლ ვაშაძეს მხარდაჭერა დაუდასტურეს. მანამდე "რესპუბლიკური პარტიის" თავმჯდომარე ხათუნა სამნიძემ თქვა, რომ  პრეზიდენტის არჩევნების მეორე ტურში რესპუბლიკური პარტია მხარს გრიგოლ ვაშაძეს დაუჭერს. 

ლევან ბერძენიშვილის თქმით, სააკაშვილმა მას საჯაროდ ბოდიში მოუხადა. სააკაშვილის ბოდიშამდე, ბერძენიშვილს პოლიტიკური თანამშრომლობა ყოფილი პრეზიდენტის ფავორიტმა და პრეზიდენტობის კანდიდატმა გრიგოლ ვაშაძემ შესთავაზა. მან ის საბჭოთა კავშირის წინააღმდეგ და საქართველოს თავისუფლებისათვის მებრძოლ პატრიოტად მოიხსენია.

საქართველოში საპრეზიდენტო არჩევნები 28 ოქტომბერს გაიმართა. 

ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების - 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ - 37,74%.

საპრეზიდენტო არჩევნების მეორე ტური საბოლოო შედეგების გამოცხადებიდან ორი კვირის ვადაში ჩატარდება. სავარაუდო თარიღად კი 2 დეკემბერი სახელდება. 

2018 წლის საპრეზიდენტო არჩევნების პირველი ტურის საბოლოო შედეგებს სრულად შეგიძლიათ გაეცნოთ ამ ბმულზე.