საია სააკაშვილის განცხადებაზე: პროტესტის გამოხატვა არ უნდა გასცდეს კანონის ფარგლებს

"ახალგაზრდა იურისტთა ასოციაციის" თავმჯდომარე სულხან სალაძე საქართველოს ყოფილი პრეზიდენტის მიხეილ სააკაშვილის განცხადებას გამოეხმაურა.

"ამ ქვეყანაში ყველა სტრუქტურას, ყველა ადმინისტრაციულ ირგანოს აქვს თავისი ფუნქცია და ყველა ვალდებულია იმოქმედოს კანონის ფარგლებში. რაც შეეხება სააკაშვილის განცადებას, ეს არის მისი განცხადება და ვფიქრობ, რომ პოლიტიკოსის მხრიდან გაკეთებული განცხადებები, არჩევნების დღესთან დაკავშირებით, როდესაც ჩვენ ვაკვირდებოდით არჩევნების დღეს, დამატებით არ საჭიროებს ჩვენი მხრიდან კომენტარს. მესმის მათი აღელვება და მათი თუნდაც შესაძლო  გაბრაზება. მაგრამ ფაქტია ერთი, რომ ყველას აქვს უფლება მშვიდობიანად გამოხატოს პროტესტი, თუმცა ამ პროტესტის გამოხატვა არ უნდა გასცდეს კანონის ფარგლებს. თანაც, მიხეილ სააკაშვილი არ არის საქართველის მოქალაქე’’, - თქვა სალაძემ.

"ნაციონალური მოძრაობის" საპრეზიდენტო კანდიდატის, გრიგოლ ვაშაძის საარჩევნო შტაბის ხელმძღვანელი გიორგი ვაშაძე ემიჯნება მიხეილ სააკაშვილის განცხადებას, რომელშიც ის ყველას სამოქალაქო დაუმორჩილებლობისკენ მოუწოდებს. როგორც გიორგი ვაშაძემ თქვა, სააკაშვილის ეს სიტყვები მისი პირადი მოსაზრებაა და ნაციონალების ოპოზიციური ჯგუფი მას არ იზიარებს.

ეგზიტპოლის შედეგების გამოქვეყნების შემდეგ, მიხეილ სააკაშვილმა თქვა, რომ შედეგებს არ ენდობა და მოსახლეობასა და ჯარს დაუმორჩილებლობისკენ მოუწოდა.

„მიუხედავად იმისა, რა შედეგები დადგება და იმედია, შედეგი იქნება, ჩვენ გადავდივართ მასობრივ დაუმორჩილებლობაზე. მე მოვუწოდებ საქართველოს პოლიციას, ჯარს, გაემიჯნოს კრიმინალურ მაფიოზურ ბანდას.მოგიწოდებთ თქვენ, აიღოთ საქართველოს გადარჩენა საკუთარ ხელში", -განაცხადა მიხეილ სააკაშვილმა "რუსთავი 2"-ის ეთერში. 

ცესკოს მონაცემებით, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების 59.52% (1 147 627 ხმა) აიღო, „ნაციონალური მოძრაობის“ კანდიდატს გრიგოლ ვაშაძეს კი ამომრჩეველთა 40.48%-მა (780 633 ხმა) დაუჭირა მხარი.

28 ნოემბერს საქართველოს მოსახლეობამ 5-ის ნაცვლად 6 წლით, პირდაპირი წესით ბოლოჯერ აირჩია ქვეყნის პრეზიდენტი.

პირველი ტური 28 ოქტომბერს გაიმართა. ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ - 37,74%.

2018 წლის საპრეზიდენტო არჩევნების მეორე ტურის საბოლოო შედეგებს შეგიძლიათ გაეცნოთ ამ ბმულზე.