გიგა ბოკერია: 7 ნოემბერი იყო ჩვენი პოლიტიკური გუნდის ძალიან დიდი ჩავარდნა

იმას, რაც 7 ნოემბერს მოხდა, პოლიტიკურად შეცდომა ჰქვია, - ამის შესახებ საპარლამენტო უმცირესობის ერთ-ერთმა ლიდერმა გიგა ბოკერიამ თქვა. ინფორმაციას სააგენტო „ინტერპრესნიუსი“ ავრცელებს. 

ბოკერია 2007 წლის 7 ნოემბერს მაშინდელი ხელისუფლების „ჩავარდნას“ უწოდებს და ამბობს, რომ თუკი ხელისუფლება ძალას იყენებს, ძალის გამოყენება უნდა მოხდეს კანონის ფარგლებში და არა იმ ფორმით, რა ფორმითაც 7 ნოემბერს მოხდა.

„ქართული საზოგადოების და ყველა პასუხისმგებლიანი პოლიტიკოსის ამოცანაა, რომ საქართველოში 7 ნოემბრის მსგავსი მოვლენები აღარასდროს მოხდეს. რა თქმა უნდა, როცა საქმე აქამდე მიდის, ეს ყოველთვის ხელისუფლების პასუხისმგებლობაა. არ აქვს მნიშვნელობა, როგორ იქცეოდა მაშინდელი ოპოზიცია ან რას ცდილობდნენ სხვა ძალები - როცა ხელისუფლება ხარ, შენი პასუხისმგებლობაა, რომ საქმე აქამდე არ მიიყვანო და ასევე, ძალის გამოყენებისას კანონის უზენაესობას ჰქონდეს ადგილი. ორივე თვალსაზრისით ეს იყო ჩვენი პოლიტიკური გუნდის ძალიან დიდი ჩავარდნა“, - თქვა გიგა ბოკერიამ.

მისივე შეფასებით, დღეს „ქართული ოცნების“ ხელისუფლება 7 ნოემბრის მოვლენებს ხალხის შესაშინებლად და ძალაუფლების შესანარჩუნებლად იყენებს.

2007 წლის 7 ნოემბრის მოვლენებიდან 11 წელი გავიდა. სამი დარბევა ერთ დღეს, აქციის დაშლა რუსთაველის გამზირსა და  რიყეზე, შეჭრა ტელეკომპანია „იმედში“ - სპეცდანიშნულების რაზმმა მომიტინგეების წინააღმდეგ ცრემლმდენი გაზი, ხელკეტები, რეზინის ტყვიები, აკუსტიკური იარაღი და წყლის ჭავლი გამოიყენა.

7 ნოემბრის საღამოს კი სპეცრაზმი ტელეკომპანია „იმედში“ შემოიჭრა და არხის მაუწყებლობა გათიშა. ამის შემდეგ იყო საგანგებო მდგომარეობა და ვადამდელი საპრეზიდენტო არჩევნები. 2008 წელს კი ტელეკომპანია „იმედი“ დამფუძნებლის, ბადრი პატარკაციშვილის გარდაცვალებიდან რამდენიმე დღეში, მის ოჯახს ჩამოართვეს.

პროკურატურამ ტელეკომპანია „იმედში“ შეჭრის და მისი დარბევის ფაქტზე შინაგან საქმეთა სამინისტროს სპეციალური ოპერატიული დეპარტამენტის ყოფილი დირექტორი ერეკლე კოდუა სამსახურებრივი უფლებამოსილების გადამეტების ბრალდებით პასუხისგებაში მისცა. ამ საქმეზე მიხეილ სააკაშვილს, ზურაბ ადეიშვილსა და დავით კეზერაშვილს პატიმრობა 2014 წლის 1 აგვიტოს შეეფარდათ.