ომბუდსმენი: საჯარო სამსახურის შესახებ კანონპროექტი შრომით უფლებებს არღვევს

ომბუდსმენს მიაჩნია, რომ აღნიშნული საკანონმდებლო ინიციატივა არღვევს პრეზიდენტის ადმინისტრაციის თანამშრომლების შრომით უფლებებს, მათ შორის, საქართველოს მოქალაქეების კონსტიტუციურ უფლებას არ გათავისუფლდნენ თანამდებობიდან დაუსაბუთებლად. ამის  შესახებ სახალხო დამცვველის გვერდზე გავრცელებულ განცხადებაში წერია. 

„კანონპროექტის მიხედვით, პრეზიდენტის ადმინისტრაციის პროფესიული საჯარო მოხელეები ჩაითვლებიან ადმინისტრაციული ხელშეკრულებით დასაქმებულ პირებად, რაც იმას ნიშნავს, რომ მათი ხელშეკრულების მოქმედების ვადა არ უნდა აღემატებოდეს პრეზიდენტის უფლებამოსილების ვადას; გარდა ამისა, ხელშეკრულების მოშლა და ახალი თანამშრომლების აყვანა ნებისმიერ დროს იქნება შესაძლებელი პრეზიდენტისვე გადაწყვეტილებით. აღსანიშნავია, რომ დღეის მდგომარეობით, ჩვენ ხელთ არსებული ინფორმაციით, პრეზიდენტის ადმინისტრაციაში მომუშავე მხოლოდ 5 პირია ადმინისტრაციული ხელშეკრულებით დასაქმებული. კანონპროექტის ინიციატორები პირთა აღნიშნულ წრეს აფართოებენ და რისკის ქვეშ აყენებენ 102 სხვა საჯარო მოხელეს, რომლებიც პრეზიდენტის ადმინისტრაციაში მუდმივ პროფესიულ ფუნქციებს ასრულებენ. 

აღსანიშნავია, რომ თავად კანონპროექტის განმარტებით, ბარათში საერთოდ არ არის მითითებული თუ კონკრეტულად რამდენ ადამიანს შეეხება ეს ცვლილება. მოხმობილი ინფორმაცია ასევე ვერ ასაბუთებს ცვლილებების საჭიროებას. განსაკუთრებულ წუხილს იწვევს ის გარემოება, რომ კანონპროექტი პარლამენტს წარედგინა ახალი პრეზიდენტის ინაუგურაციამდე რამდენიმე დღით ადრე“ - წერია სახალხო დამცველის განცხადებაში. 

კანონპროექტის მიხედვით, პრეზიდენტის ადმინისტრაციის ყველა თანამშრომელს საჯარო მოხელის სტატუსი უწყდებათ. ისინი ვალდებულები ხდებიან ხელშეკრულება ადმინისტრაციასთან გააფორმონ და სამსახურში კონკურსის გარეშე შეარჩიონ.

საჯარო სამსახურის შესახებ კანონპროექტი გააკრიტიკა პრეზიდენტის ადმინისტრაციის მოქმედმა ხელმძღვანელმა გიორგი აბაშიშვილმაც. მისი თქმით, პარლამენტის მიერ მომზადებული კანონპროექტი ლაჩრული და ვერაგულია.

საპარლამენტო უმრავლესობიდან, დარგობრივი კომიტეტის თავმჯდომარემ რომან კაკულიამ კი განაცხადა, რომ  საჯარო მოხელეთა დაცულობა ერთ-ერთი მთავარი პრიორიტეტია და არ უნდა მიიღონ ისეთი გადაწყვეტილებები, რომლებიც საზოგადოებას და მოხელეებს "გააკვირვებს". თუმცა უმრავლესობის ნაწილი ფიქრობს, რომ პრეზიდენტს ახალი ადმინისტრაციის დაკომპლექტება უნდა შეეძლოს.

ოპოზიცია კი თავის მხრივ, კანონპროექტს აკრიტიკებს და არ ეთანხმება.