ირაკლი კობახიძე: გადავდივართ სრულად საპარლამენტო მმართველობაზე

16 დეკემბერი ისტორიული დღეა, ძალაში შედის საქართველოს კონსტიტუციის ახალი რედაქცია, - განაცხადა პარლამენტის თავმჯდომარემ. ირაკლი კობახიძის თქმით, დოკუმენტის მთავარი მიღწევაა ის, რომ სრულად გამორიცხავს ავტოკრატიის განმეორებას.

„1990-იან წლებში ჩვენი მთავარი პრობლემა იყო, რომ სხვადასხვა ხელისუფლებას ავტოკრატიული რეჟიმის ჩამოყალიბების საშუალება ეძლეოდა. სრულად საპარლამენტო მმართველობაზე გადავდივართ, რომელიც  ყველაზე დემოკრატიული მმართველობის ფორმად  არის აღიარებული საყოველთაოდ. 2020 წლიდან პროპორციული საარჩევნო სისტემა ამოქმედდება, რაც ძალიან მნიშვნელოვანია. შემოღებული იქნება პრეზიდენტის არაპირდაპირი არჩევის წესი, რაც ასევე ძალიან მნიშვნელოვანი ცვლილებაა“, – განაცხადა ირაკლი კობახიძემ.

მისი შეფასებით, პრეზიდენტის პირდაპირი წესით არჩევა  საპარლამენტო მმართველობასთან თავსებადი არ არის. „ამის დასტური იყო ეს საპრეზიდენტო არჩევნები. საპრეზიდენტო კანდიდატები პროგრამებით ვერ გამოდიოდნენ და ხშირ შემთხვევაში,  ტყუილი დაპირებების გაცემა უწევდათ.

არჩევნები კონცეტრირებული იყო პიროვნულ თავდასხმებსა და შეურაცხყოფაზე.  ეს იმ ნონსენსის გამოძახილი იყო, რასაც საპარლამენტო მმართველობაში პირდაპირი არჩევნების ჩატარება ჰქვია. არასწორია და კარგია, რომ შემდეგი არჩევნები არაპირდაპირი წესით ჩატარდება“, - განაცხადა საქართველოს პარლამენტის თავმჯდომარემ.

ამასთან, მისივე თქმით, ძლიერდება ოპოზიცია, საქართველოში  მაღალი სტანდარტით იქნება დაცული ადამიანის უფლებები, გაიზრდება სასამართლოს დამოუკიდებლობის გარანტიები და ფართოვდება პროკურატურის დამოუკიდებლობა. „ეს არის მცირე ჩამონათვალი იმისა, რაც 16 დეკემბერს ამოქმედდება“, – აღნიშნა ირაკლი კობახიძემ.

16 დეკემბერს თელავში საქართველოს ახლადარჩეული პრეზიდენტის, სალომე ზურაბიშვილის ინაუგურაცია გაიმართება. სწორედ ინაუგურაციის შემდეგ ამოქმედდება საქართველოს კონსტიტუციის ახალი რედაქცია.