კახა კალაძე: ჩემთვის თბილისის მერობა ცხოვრების უმნიშვნელოვანესი და საპასუხისმგებლო პოზიციაა

თბილისის მერმა კახა კალაძემ დედაქალაქის მერიის საქმიანობის ერთი წლის შედეგები თბილისის საკრებულოს დეპუტატებს გააცნო. როგორც მან განაცხადა, "იოლი არ არის, საკუთარ თავზე აიღო ამხელა პასუხისმგებლობა - იყო ამ დიდებული ქალაქის მერი".

მისი განცხადებით, თბილისი მრავალსაუკუნოვანი ისტორიის მქონე, მრავალეთნიკური, მრავალფეროვანი ქალაქია. "აქედან გამომდინარე, არ არის იოლი, საკუთარ თავზე აიღო ამხელა პასუხისმგებლობა; პასუხისმგებლობა შენი ქვეყნის დედაქალაქის, მისი ისტორიის, მისი მომავლის წინაშე და იყო ამ დიდებული ქალაქის მერი. ჩემთვის პირადად თბილისის მერობა არის  ცხოვრების  უმნიშვნელოვანესი  და  საპასუხისმგებლო  პოზიცია. მინდა, რომ ჩვენ  ყველა - ვინც  დღეს  ამ დარბაზში  ვიმყოფებით,  ვიყოთ  ერთსულოვნები  და  მოტივირებულები,  მოვაწესრიგოთ ეს ქალაქი, დავუბრუნოთ ხიბლი, კომფორტულობა და თვითმყოფადობა", - განაცხადა კახა კალაძემ.

მერმა ასევე აღნიშნა, რომ ამ ერთი წლის განმავლობაში, ის მუდამ გრძნობდა პოლიტიკური გუნდის მხარდაჭერას და თანადგომას. 

„რა თქმა უნდა, ამ საქმეში მუდამ ვგრძნობდი და ვგრძნობ პოლიტიკური გუნდის მხარდაჭერას და თანადგომას, რაც ყოველ ნაბიჯზე პრაქტიკულ ქმედებებში გამოიხატება საკრებულოს, მთავრობის, პარლამენტის თუ სხვა უწყებების მხრიდან. ეს ცხადია, პირველ რიგში, თბილისელებისადმი გამოხატული უდიდესი მხარდაჭერაა, რისთვისაც მინდა, მადლობა გადავუხადო ჩვენი პოლიტიკური გუნდის ლიდერებს და თითოეულ წევრს. ამ ერთი წლის მანძილზე მერიის საქმიანობაში სხვადასხვა ფორმით, პრაქტიკულად, თითოეული თქვენგანი იყო ჩართული. თქვენ მონაწილეობას იღებდით ჩვენი ქალაქისთვის ძალიან მნიშვნელოვანი პროექტების შედგენასა და განხორციელებაში. ზოგი - პროფესიული მიდგომების თუ ცოდნის გაზიარებით, ზოგი - პოლიტიკური მხარდაჭერით, ზოგიც - კრიტიკით, რომელიც დემოკრატიის განუყოფელი ნაწილია. ბუნებრივია, მე ვისურვებდი, ეს კრიტიკა იყოს ობიექტური, მაქსიმალურად საგნობრივი, საქმეზე, ქალაქის და მოქალაქეების საჭიროებებზე, პრობლემების გადაწყვეტაზე და არა პრობლემების შექმნაზე ორიენტირებული“, - აღნიშნა კახა კალაძემ.  

ამასთან, თბილისის მერმა საკრებულოს წევრებს და თბილისელებს მადლობა გადაუხადა იმ მხარდაჭერისთვის, რომელიც, მისი თქმით, მისთვის დიდი მოტივაციაა.

თბილისის მერმა ასევე აღნიშნა, რომ განვლილი ერთი წელი მარტივი არ იყო, თუმცა არსებითი ნაბიჯი გადაიდგა თბილისის წინაშე არსებული გამოწვევების დასაძლევად.

დღესვე თბილისის საკრებულო 2019 წლის ბიუჯეტის პროექტს უნდა უყაროს კენჭი, თუმცა სხდომა მანამდე ოპოზიციის ნაწილმა პროტესტის ნიშნად დატოვა.