ლევან მურუსიძე ამბობს, რა შემთხვევაში დაფიქრდება თანამდებობიდან გადადგომაზე

მოსამართლე ლევან მურუსიძე არასამთავრობო სექტორის განცხადებებს პასუხობს, რომელიც მის მიერ სანდრო გირგვლიანის საქმის განხილვასთან დაკავშირებულ კრიტიკას შეეხება. ინფორმაციას 1tv.ge ავრცელებს.

ლევან მურუსიძის განცხადებით, თუ არასამთავრობოები გირგვლიანის საქმეზე კონკრეტულ ბრალდებას ჩამოუყალიბებენ, მაშინ გადადგომის შესახებ დაფიქრდება.

"თუ ისინი ამას დამიდასტურებენ, შემდგომ განვიხილავ გადადგომის საკითხს. ლევან მურუსიძე ახლა რომ გადადგეს, არასერიოზულად მიმაჩნია", – განაცხადა ლევან მურუსიძემ და მესამე სექტორს ფუნქციების შესახებ შეახსენა. როგორც მან თქვა, არასამთავრობოების ფუნქცია არ არის იმის თქმა, სასამართლო ხელისუფლებაში ვინ უნდა გადადგეს და ვინ არა.

"ყველა შეკითხვაზე მაქვს გაცემული პასუხი, პირდაპირ ეთერში ვპასუხობდი. გასაუბრებაზე იმასაც დააკვირდებოდით, რომ, როდესაც კითხვაზე ვცემდი პასუხს, ნაზი ჯანეზაშვილი და ანა დოლიძე იმწამსვე გაჩერდებოდნენ და სხვა კითხვაზე გადადიოდნენ. აქედანაც ჩანდა, რომ ჩემს პასუხზე არავითარი დასამატებელი და შესაკითხი არ ქონდათ.

თუ კიდევ რაიმე პრეტენზია აქვთ ამ საქმეზე ლევან მურუსიძის როლზე, მზად ვარ, წავიკითხო არასამთავრობოების მიერ ჩამოყალიბებული წერილობითი ბრალდება, რაზეც გავცემ ასევე დამაჯერებელ პასუხს, შეუძლებელია ამ საქმეში მურუსიძის დადანაშაულება", – აცხადებს ლევან მურუსიძე.

არასამთავრობო ორგანიზაციები იუსტიციის უმაღლესი საბჭოს იმ წევრების გადადგომას მოითხოვენ, რომლებმაც მათი თქმით, "კლანური პრინციპით მიღებულ გადაწყვეტილებებს მხარი დაუჭირეს". საუბარია ლევან მურუსიძის უვადოდ განწესებასა და უზენაესი სასამართლოს მოსამართლეობის კანდიდატებთა სიაზე. ამასთან დაკავშირებით, მესამე სექტორის 10-მა წარმომადგენელმა დღეს განცხადება გაავრცელა.