დავით სერგეენკო: ტამიფლუზე დეფიციტი არ გაჩნდება

ჯანდაცვის მინისტრი დავით სერგეენკოს თქმით, სამედიცინო დაწესებულებებში გრიპის ვირუსის ჩივილებით მიმართვიანობა ზუსტად ისეთივეა, როგორც ორი წლის წინ, თუმცა იმ განსხვავებით, რომ 2 წლის წინ H1N1ვირუსი არ დომინირებდა. ამის შესახებ მან „იმედის“ ეთერში განაცხადა.

მისი განმარტებით, ტამიფლუს მარაგი ქვეყანაში არის სიჭარბით და არავითარი დეფიციტი არ წარმოიშვება. თუმცა, ეს პრეპარატი გრიპის მკურნალობის უნივერსალური საშუალება არ არის და მისი დანიშნულება ექიმმა უნდა განსაზღვროს.

რამდენიმე დღის წინ, ჯანდაცვის მინისტრმა დავით სერგეენკომ განაცხადა, რომ გაფართოვდა იმ პირთა წრე, რომლებიც ანტივირუსულ პრეპარატ „ტამიფლუს“ უფასოდ მიიღებენ. ასევე ქვეყანაში ამ პრეპარატის დეფიციტის გამო შექმნილი ვითარებიდან გამომდინარე, სამინისტრო "ტამიფლუს" აფთიაქებს საკუთარი მარაგიდან მიაწვდის.

ქვეყნის მასშტაბით აფთიაქებში "ტამიფლუს" მარაგი 10 იანვრიდან შეივსება. მანამდე კი პრეპარატი „ტამიფლუ“, რომელიც გრიპის სამკურნალოდ გამოიყენება, 6 იანვრიდან თბილისის მასშტაბით ოთხ სააფთიაქო ქსელში – „პე-ეს-პეში“, „ავერსში“, „ჯი-პი-სისა“ და „ფარმადეპოში“ იყიდება. 

შეგახსენებთ, რომ უფასოდ "ტამიფლუს" მისაღებად აუცილებელია, რომ ადგილზე მოქალაქემ წარადგინოს ექიმის დანიშნულება (ფორმა 100).

მინისტრის თქმით, ვირუსის სიმპტომების აღმოჩენისთანავე, პაციენტმა უნდა მიმართოს ოჯახის ექიმს და არა სასწრაფო დახმარებას.

ამ დროისთვის საქართველოში ე.წ. ღორის გრიპის ვირუსით უკვე 12 ადამიანია გარდაცვლილი.