ილია მეორემ უკრაინის ეკლესიის თემა მსოფლიო საპატრიარქოს წარმომადგენლებთან განიხილა

უკრაინის ავტოკეფალიის საკითხზე საქართველოს საპატრიარქოში შეხვედრა დასრულდა. როგორც ცნობილია, მსოფლიო საპატრიარქოს დელეგაციასთან შეხვედრა თითქმის 2 საათის განმავლობაში მიმდინარეობდა.

მსოფლიო საპატრიარქოს წარმომადგენელმა, მეუფე ემანუელმა საქართველოს კათოლიკოს-პატრიარქ ილია მეორესთან შეხვედრის შემდეგ განაცხადა, რომ „ეს იყო ძმური შეხვედრა მოძმე ეკლესიებს შორის.“

"განსაკუთრებული სიხარული მინდა გამოვხატო, რომ ჩვენ ვართ საქართველოში და მოგვეცა საშუალება, კიდევ ერთხელ შევხვედროდით სრულიად საქართველოს კათოლიკოს-პატრიარქს. შეხვედრაზე საუბარი ეხებოდა გარკვეულ საკითხებს, გვქონდა აზრთა გაცვლა-გამოცვლა. რასაკვირველია, უკრაინის ეკლესიის ავტოკეფალიის საკითხზეც ვისაუბრეთ და ტომოსზეც გვქონდა მსჯელობა.

რაც შეეხება უკრაინის ეკლესიის ავტოკეფალიის საკითხს, ჩვენი მიზანი არ იყო რაიმე აზრის თავსმოხვევა, ზეწოლა ან შეთავაზება. ეს იყო მხოლოდ ინფორმაციული შეხვედრა და დეტალებზე შეთანხმება  იმ საკითხებზე, რაზეც საუბარია ტომოსში. საქართველოს კათოლიკოს-პატრიარქს აქვს სიბრძნე, რათა ბრძნული გადაწყვეტილება მიიღოს. ეს იყო ძმური, ეკლესიური და საერთო შეთანხმებული შეხვედრა მსოფლიო საპატრიარქოს წარმომადგენლებს, საქართველოს ეკლესიის მეთაურსა და მღვდელმთავრებს შორის“, - განაცხადა მეუფე ემანუელმა.

მეუფე შიომ მსოფლიო საპატრიარქოს დელეგაციას მადლობა გადაუხადა საქართველოს ეკლესიის მიმართ მიდგომისთვის.

"კონსტრუქციული შეხვედრა იყო. მადლობას ვუხდით მათ ასეთი კორექტული მიდგომისთვის საქართველოს ეკლესიის მიმართ. განვიხილეთ ძალიან ბევრი დეტალი. რაც მთავარია, გამოიკვეთა მათი კორექტული პოზიცია ჩვენი ეკლესიის მიმართ, რომ ისინი არ ჩამოსულან, რათა დაგვარწმუნონ, მივიღოთ ესა თუ ის გადაწყვეტილება. ამასთან, მნიშვნელოვანია, რომ ამ ეტაპზე ჩვენს აუჩქარებლობას, რა პოზიციაც გვაქვს, სრული გაგებით ეკიდებიან.

წლის ბოლოს გვქონდა სინოდის სხდომა და იქ დადგინდა, რომ ეს განხილვა გადაიდება შემდგომი სინოდისთვის, რადგან არსებობს ბევრი დეტალი და მრავალი შეკითხვა სინოდში. ამას სჭირდება განხილვა და მუშაობა. ვადებზე ვერაფერს გეტყვით.

სამწუხაროდ, ჩვენთან არის ასეთი განწყობები, რომ ჩვენი ამჟამინდელი პოზიცია რაღაცნაირად ასოცირდებოდეს ვიღაცის მიერ, რომ ეს არის რუსული გავლენა. თქვენ დღეს მოისმინეთ მსოფლიო საპატრიარქოს პოზიცია, რომ ისინიც ეთანხმებიან ჩვენს პოზიციას. ჩვენს ეკლესიაზე ეს ნამდვილად არაა, რადგან ჯერ როგორც ჩანს, ყველა ეკლესია პოზიციის დაფიქსირებისგან თავს იკავებს“, - განაცხადა მეუფე შიომ.

დღის ბოლოს, ამ შეხვედრის დეტალების შესახებ ტელეკომპანია „მაესტროს“ დეკანოზი ანდრია ჯაღმაიძე ელაპარაკა. 

მსოფლიო საპატრიარქოს დელეგაცია საქართველოში გუშინ ჩამოვიდა და ქვეყანას დღეს დატოვებს.