პარლამენტში უსაფრთხოების საბჭოში პრეზიდენტის მონაწილეობის საკითხს განიხილავენ

პარლამენტში „ეროვნული უსაფრთხოების პოლიტიკის დაგეგმვისა და კოორდინაციის წესის შესახებ“ კანონში მომზადებულ ცვლილებებზე მსჯელობენ.

კანონპროექტში წერია, რომ უსაფრთხოების საბჭო პრემიერმინისტრთან არსებული ანალიტიკური ცენტრია, რომლის წევრებიც არიან: პრემიერმინისტრი, თავდაცვის მინისტრი, შინაგან საქმეთა მინისტრი, საგარეო საქმეთა მინისტრი, ფინანსთა მინისტრი, სახელმწიფო უსაფრთხოების სამსახურის უფროსი, დაზვერვის სამსახურის უფროსი და თავდაცვის ძალების მეთაური.

კანონპროექტის მიხედვით, საბჭოს წევრების ჩამონათვალში საქართველოს პრეზიდენტი არ არის, რაც დისკუსიის საგანი გახდა. პრეზიდენტის საპარლამენტო მდივანი დიმიტრი გაბუნია აცხადებს, რომ საბჭოს მუშაობაში პრეზიდენტის მონაწილეობის უზრუნველყოფის საკითხზე პრეზიდენტის ადმინისტრაცია პარლამენტთან კონსულტაციას გადის. ამ თემას გაბუნია პარლამენტის თავდაცვისა და უშიშროების კომიტეტის თავმჯდომარესთან ირაკლი სესიაშვილთან განიხილავს. 

დიმიტრი გაბუნია აცხადებს, რომ პრეზიდენტს უსაფრთხოების საბჭოს მუშაობაში მონაწილეობის შესაძლებლობა უნდა ჰქონდეს და ამისთვის კანონში შესაბამისი ჩანაწერი უნდა გაჩნდეს.

"ეს არის ჩვენი ცალსახა პოზიცია. გვინდა, რომ კონსულტაციების შედეგად პარლამენტი დავარწმუნოთ, რომ ეს აუცილებელია გამომდინარე იქედან, რომ პრეზიდენტი არის უმაღლესი მთავარსარდალი და საომარი და საგანგებო მდგომარეობის დროს მას უნდა გააჩნდეს უფლებამოსილება საბჭოს სხდომებში მიიღოს მონაწილეობა. ჩვენ კარგად გვესმის, რომ მთავრობის სათათბირო ორგანოში პრეზიდენტის, როგორც წევრის მონაწილეობამ, შეიძლება გარკვეული უხერხულობა შექმნას, თუმცა სხვადასხვა ქვეყნების გამოცდილების გათვალისწინებით, პრეზიდენტს უნდა ჰქონდეს უფლებამოსილება და დისკრეცია, მონაწილეობა მიიღოს უსაფრთხოების საბჭოს მუშაობაში“, - განაცხადა დიმიტრი გაბუნიამ, რომლის კომენტარსაც სააგენტო "ინტერპრესნიუსი" ავრცელებს.

უსაფრთხოების საბჭოს მუშაობაში პრეზიდენტის ჩართულობასთან დაკავშირებით გუშინ კომენტარი თავდაცვისა და უშიშროების კომიტეტის თავმჯდომარემ ირაკლი სესიაშვილმა გააკეთა. 

ირაკლი სესიაშვილის თქმით, როდესაც უსაფრთხოების საბჭო პრემიერთან არსებული სათათბირო ორგანოა, ძირითად შემადგენლობაში პრეზიდენტი ვერ იქნება. სესიაშვილის შეფასებით, პრეზიდენტის ნაწილში ოპოზიციის შენიშვნები "არასწორი და სისტემიდან ამოვარდნილია".

"პრეზიდენტსა და მთავრობას შორის უფლებამოსილება მკაფიოდ არის გადანაწილებული. ეროვნული უსაფრთხოების საბჭო არანაირ გადაწყვეტილებას არ აიღებს, სათათბირო ორგანოა და ოპონენტებს ეშლებათ, როცა კითხულობენ, პრეზიდენტი ჩართული რატომ არ არის. ეროვნული უსაფრთხოების საბჭო მნიშვნელოვანი ორგანოა, რათა უსაფრთხოების, თავდაცვის პოლიტიკის კოორდინაცია და დაგეგმვა მოხდეს. ეს არის პრემიერის სათათბირო ორგანო, სადაც ორგანოებს ექნებათ საშუალება, მეტი კოორდინაციით და ნაკლები რესურსის დანახარჯით მოახდინონ საკუთარი შესაძლებლობის გაზრდა და ქვეყნის უსაფრთხოებას მოემსახურონ", – განუცხადა 1tv.ge-ს ირაკლი სესიაშვილმა.

პრეზიდენტის ადმინისტრაციის პრესსპიკერი ხატია მოისწრაფიშვილის თქმით, უსაფრთხოების საბჭოსთან პრეზიდენტის თანამშრომლობის ფორმატთან დაკავშირებით ხელისუფლებასთან კონსულტაციები იგეგმება:

"„რა თქმა უნდა, პრეზიდენტი ვერ იქნება აღმასრულებელი ხელისუფლების სათათბირო ორგანოს წევრი, თუმცა მიგვაჩნია, რომ მისი კონსტიტუციური ვალდებულებებიდან გამომდინარე, აუცილებელია, მონაწილეობის ფორმატი გამოიძებნოს", - თქვა ხატია მოისწრაფიშვილმა.

პრეზიდენტის მიერ ფიცის დადების შემდეგ, 2018 წლის 16 დეკემბერს საქართველოს ახალი კონსტიტუცია ამოქმედდა. კონსტიტუციის მიხედვით, გაუქმდა უშიშროების საბჭო და მის ნაცვლად, საომარი მდგომარეობის დროს, სათათბირო ორგანო ეროვნული თავდაცვის საბჭოს შექმნა განისაზღვრა, რომლის თავმჯდომარეც საქართველოს პრეზიდენტი იქნება. 

უშიშროების საბჭოს ნაცვლად კი უნდა შეიქმნას ეროვნული უსაფრთხოების საბჭო, რომელიც პრემიერმინისტრთან არსებული უსაფრთხოების საკითხების მაკოორდინირებელი სათათბირო ორგანო იქნება.